Ճանապարհների ապաշրջափակմամբ՝ մեր տնտեսությունը ՌԴ-ի և Իրանի հետ կկապվի էժան և մեծածավալ բեռնափոխադրումներ ապահովող տրանսպորտով՝ երկաթուղիով

ԱԺ «Իմքայլական» պատգամավոր Գևորգ Պապոյանը ֆեյսբուքյան իր էջում գրել է.

Աներկբա է.

1. Հայաստանի տնտեսության երկարաժամկետ կայուն զարգացման համար անհրաժեշտ է կարճ արդյունաբերական շղթաներից անցում կատարել երկար՝ բազմափուլ արդյունաբերական շղթաների, օրինակ պղնձի կամ մոլիբդենի հանքաքար խտանյութի պարզ արդյունահանում-արտահանումից պետք է անցնել նվազագույնը մաքուր պղնձի, իսկ առավելագույնը՝ պղնձից ստացվող արտադրանքների արտադրության և արտահանման։ Նույնը գյուղատնտեսության (միրգ-բանջարեղենի արտահանմանը զուգահեռ պետք է կտրուկ աճի վերամշակված գյուղմթերքի ծավալները) և այլ ոլորտներում։

2. Այդ արտադրանքների՝ միջազգային շուկաներում մրցունակ լինելու և ստացվող շահույթի մարժան մեծացնելու համար անհրաժեշտ է էժան և անխափան (շատ կարևոր է հատկապես Վերին Լարսի պարբերաբար փակման ֆոնին) տրանսպորտ, ինչպիսին հանդիսանում է երկաթուղին և ինչպիսին չի հանդիսանում ավտոմոբիլային բեռնափոխադրումը։

3. Երկաթուղու գործարկումը հնարավորություն կտա այդ արտադրանքները անխոչընդոտ և համեմատաբար ցածր գնով արտահանել կամ պատրաստի արտադրանք արտադրելու համար անհրաժեշտ հումքը ներմուծել ավելի էժան եղանակով։

4. Այս ամենը հնարավոր է միայն ճանապարհների ապաշրջափակման պայմաններում, ինչը հնարավորություն կտա մեր տնտեսությունը Ռուսաստանի և Իրանի հետ կապել էժան և մեծածավալ բեռնափոխադրումներ ապահովող տրանսպորտով՝ երկաթուղիով։