««Հայաստանի Հանրապետության ընտրական օրենսգիրք» սահմանադրական օրենքում փոփոխություններ և լրացումներ կատարելու մասին» օրենքը նախագահ Արմեն Սարգսյանը չի ստորագրելու։ Նախագահը նման որոշման է հանգել մի շարք գործոններ հաշվի առնելով, այդ թվում մատնանշելով այն, որ օրենքն ընդունվել է միայն քաղաքական մեծամասնության քվեարկության արդյունքում։
«Լուսավոր Հայաստան» խմբակցության քարտուղար Գևորգ Գորգիսյանն այսօր լրագրողների հետ զրույցում նշեց, որ համաձայն է Արմեն Սարգսյանի հետ՝ «Իմ քայլը» միանձնյա է ընդունել ռեյտինգային ընտրակարգը սովորական համամասնականով փոխարինելու նախագիծը։ Նա հույս հայտնեց, որ իշխող ուժը այնքան խելամտություն կդրսևորի, որ Ընտրական օրենսգրքի այլ փոփոխությունների չի գնա։
«Ըստ բոլոր հաշվարկների՝ Փաշինյանը պետք է ամսի 25-26-ին հրաժարական տա։ Այսինքն, դա կնշանակի՝ ԸՕ փոփոխություն, երբ արդեն վարչապետը հրաժարական է տվել, ինչն աբսուրդ է»,- ասաց ընդդիմադիր խմբակցության պատգամավորը։
Գորգիսյանի խոսքով՝ ԸՕ-ն փոխել, երբ արդեն ընտրական պրոցեսն է սկսել, խնդրահարույց է։ Պատգամավորը շեշտեց՝ այս փուլում Ընտրական օրենսգրքում փոփոխություններ իրականացնելը ոչ մի կապ չունի ընտրական բարեփոխումների հետ, և ոչ մի կապ չունի երկրի շահի հետ։
Հատկանշական է, որ Արմեն Սարգսյանի՝ օրենքը չստորագրելու մասին որոշումը ոմանք գոհունակությամբ են ընդունել, իսկ որոշ արտախորհրդարանական ուժերի շրջանում դժգոհություն է առաջացրել։ Վերջինները հանդես են եկել հակադարձ հայտարարությամբ՝ ընդգծելով ընտրություններից առաջ ընտրական բարեփոխումներն ավարտին հասցնելու անհրաժեշտությունը՝ միաժամանակ, հորդորելով նախագահին ստորագրել օրենսդրական փաթեթը։
Ուշագրավ է, որ Գևորգ Գորգիսյանն աբսուրդ է համարում Ընտրական օրենսգրքի այլ բարեփոխումների մասին հնարավոր խոսակցությունները, իսկ «Արդարություն», «Ժողովրդավարական հայրենիք», «Հայ կառուցողական» և այլ կուսակցություններ կոչ են անում Ազգային ժողովին՝ օր առաջ ընդունել Ընտրական օրենսգրքի, Քրեական օրենսգրքի և հարակից փոփոխությունների փաթեթը, քանզի առաջիկա ընտրություններում կուսակցությունները քաղաքական և գաղափարական մրցակցության խթանման համար կարևորում են անցողիկ շեմի և ընտրական գրավի նվազեցումը, նախընտրական քարոզչության կանոնների հստակեցումը, նախընտրական քարոզչության ֆինանսավորման կարգի հստակեցումն ու ապահովումը, վարչական ռեսուրսի սահմանումն ու չարաշահման արգելումը։
Քրիստինե Հովսեփյան
