Ո՞վ կհանձնի Քոչարյանին

Իսկ ո՞վ չի հանձնի։ Անշուշտ, կգտնվեն մարդիկ, որ դեմ կլինեն առհասարակ որեւէ դատի, բայց հիմնական վեճի առարկան կլինի հետեւյալը՝ հանձնել միջազգային տրիբունալի՞ն, թե՞ դատել Հայաստանում, թեկուզ եւ անօրինական ճանապարհով իշխանությունը զավթելու մեղադրանքով: Դա իբրեւ սկիզբ:

Հետո այնքան վկայություններ առաջ կգան եւ այնքան ցուցմունքներ կտրվեն, որ Քոչարյանը կփոշմանի, որ նախապես մեղայականով չի ներկայացել: Որոշողը, վերջին հաշվով, կլինի օրվա իշխանությունը։ Սերժը կհանձնի` առանց երկմտելու, որովհետեւ Հենրիկ Պողոսյանին հանձնելուց սկսել է, վերջացրել Վազգենով ու Սամվել Բաբայանով, էս մեկը ինչո՞ւ պիտի բացառություն անի: Նաեւ` այն պատճառով, որ բենզինի ու թանկարժեք մետաղների փողերի մեծ մասը պահվում է, անշուշտ, ոչ Ռուսաստանում, այլ Ինտերպոլի լիազորությունների սահմաններում: Եւ, հետեւաբար, միանշանակ խոսել Սերժի ռուսական կապվածությունների մասին, չի կարելի: Նրա միակ կապվածությունը փողն է, եւ որտեղ այն ապահով կլինի, այնտեղ էլ ապահովություն կփնտրի ինքը: Եւ ուրեմն` կհանձնի: Դեռ մի բան էլ՝ բոլոր սպանությունները կդնի վզին: Իսկ հայերի քանի՞ տոկոսը դեմ կլինի Քոչարյանին հանձնելուն. անհարմար էլ է հաշվելը:

ապրիլ 2001 թ.