Մենք պետք է մեր արևմտյան գործընկերների հետ ձևակերպենք մեր ակնկալիքը, և սահմանենք՝ որոնք են մեր կարմիր գծերը Արցախի և ՀՀ անվտանգության հարցում․ Ա․ Բաբաջանյան (տեսանյութ)

Թիվ 1 ստուդիայում հյուրընկալվել է Հանուն Հանրապետության կուսակցության հիմնադիր Արման Բաբաջանյանը։ Զրույցի ընթացքում պարոն Բաբաջանյանը նշեց, որ մենք պետք է մեր արևմտյան գործընկերների հետ ձևակերպենք մեր ակնկալիքը, և սահմանենք՝ որոնք են մեր կարմիր գծերը Արցախի և ՀՀ անվտանգության հարցում։

Չունենք Իրանի հետ հստակ մշակված քաղաքականություն, ռազմավարություն և սա ամենամեծ խնդիրն է։ Կարելի է ունենալ թերի, կարելի է ունենալ չմշակված, բայց քաղաքականության չգոյությունը սպառնալիք է։ Այնուհետև հավելեց, մենք պիտի ժամ առաջ փորձենք Ռուսաստանի, ԵԱՀԿ-ի նաև Մինսկի խմբի ջանքերի համատեղում իրականացնել այս ուղղությամբ, որպեսզի այն փաստաթուղթը, որը մեզ կառաջարկվի առաջիկայում ստորագրելու, հնարավորինս ռիսկերը նվազեցված լինեն և մաքսիմալ մենք կարողանանք դրանցում հայկական շահը առաջ տանել։

Մեր միջազգային գործընկերների հետաքրքրությունը չի նվազել Հայաստանի նկատմամբ, ընդհակառակը, ավելի ու ավելի են բացվել աշխարհի հետ հարաբերվելու մեր հնարավորությունները, բայց, միևնույն ժամանակ, մենք տեսնում ենք կաշկանդվածությունը Ռուսաստանից, Ռուսաստանի ճնշումներից․ տեսնում ենք, որ երկրի անվտանգության հարցերում ամբողջությամբ կախված ենք բացառապես Ռուսաստանի կամքից, և սա էապես նվազեցնում է Հայաստանի իշխանությունների և Հայաստանի մեր մյուս գործընկերների հետ հարաբերվելու հնարավորությունները։

Անդրադառնալով փողոցային պայքարի շրջանակներին պարոն Բաբաջանյանը նշեց՝ տպավորություն կա, որ փողոցային պայքարի դուրս եկած շրջանակների և այդ եռակողմ ձևաչափով փաստաթղթի ստորագրությունը կազմակերպողների միջև ընդհանուր օրակարգ կա։