Վանո Սիրադեղյանի հոգեհանգիստը տեղի կունենա Օպերայում, հուղարկավորությունը՝ հայրենի գյուղում

Հայտնի է պետական, հասարակական գործիչ Վանո Սիրադեղյանի հուղարկավորության օրն ու վայրը: Դեկտեմբերի 3-ին տեղի կունենա Սիրադեղյանի հոգեհանգստի արարողությունը, իսկ դեկտեմբերի 4-ին` հուղարկավորությունը: Տեղեկությունը «Հայկական ժամանակ»-ին հայտնեց Բնակչության հատուկ սպասարկման ՀՈԱԿ-ի (Թաղման բյուրո) տնօրեն Վահե Խաչատրյանը, որը Սիրադեղյանի հուղարկավորման համար ձեւավորված կառավարական հանձնաժողով անդամ է նաեւ:

«Սիրադեղյանին հուղարկավորելու են իր հայրենի Կոթի գյուղում, իսկ հոգեհանգստի արարողությունը տեղի է ունենալու Ալեքսանդր Սպենդիարյանի անվան Օպերայի եւ բալետի ազգային ակադեմիական թատրոնում»,-ասաց Խաչատրյանը:

Վանո Սիրադեղյանի մահվան մասին հայտնի էր դարձել հոկտեմբերի 16-ի երեկոյան: Լուրը հայտնել էին նրա ընտանիքի անդամները՝ որդին՝ Խաչատուր Սիրադեղյանը և կինը՝ Ռուզան Տոնոյանը: Նա 75 տարեկան էր: Ավելի վաղ վարչապետ Նիկոլ Փաշինյանն այցելել էր Սիրադեղյանի ընտանիքին, ցավակցություն հայտնել վերջինիս մահվան կապակցությամբ և իր զորակցությունը փոխանցել:

Հիշեցնենք նաեւ, որ ՀՀ վարչապետի որոշմամբ՝ գրող, պետական գործիչ Վանո Սիրադեղյանի մահվան կապակցությամբ ստեղծվել էր թաղման հանձնաժողով եւ հաստատվել դրա անհատական կազմը: Հանձնաժողովը ղեկավարում է վարչապետի աշխատակազմի ղեկավար Արայիկ Հարությունյանը: