Բալթյան երկրներն ու Լեհաստանը դիմել են ՆԱՏՕ-ին

Լիտվան, Լատվիան, Էստոնիան և Լեհաստանը ՆԱՏՕ-ին խնդրում են կիրառել Հյուսիսատլանտյան պայմանագրի 4-րդ հոդվածը՝ կապված Ուկրաինայում Ռուսաստանի ռազմական գործողության հետ։

ՆԱՏՕ-ի կանոնադրության 4-րդ հոդվածը ենթադրում է դաշինքի հրավիրում խորհրդակցությունների համար, եթե դաշինքի երկրներից մեկը կարծում է, որ վտանգ կա իր անվտանգությանը, կամ դաշնակիցներից մեկին սպառնացող վտանգի դեպքում:

Էստոնիայի վարչապետ Կայա Կալլասը Ռուսաստանի ներխուժումն Ուկրաինա համարել է սպառնալիք աշխարհի և ՆԱՏՕ-ի բոլոր երկրների համար։

1949 թվականին Հյուսիսատլանտյան դաշինքի ձևավորումից ի վեր, 4-րդ հոդվածը կիրառվել է վեց անգամ, վերջինը՝ Թուրքիայի խնդրանքով 2020 թվականին սիրիական Իդլիբում թուրք զինվորների սպանությունից հետո։

Հիշեցնենք` Վլադիմիր Պուտինը փետրվարի 24–ին հայտարարեց, որ որոշում է կայացրել Դոնբասում հատուկ ռազմական գործողության մասին։