Ոստիկանների պահանջի նկատմամբ ակնհայտ արհամարհանքի դեպքում վերջիններս պարտավոր են կիրառել համաչափ ուժ։

Այս մասին ֆեյսբուքյան իր էջում գրառում է արել ՀՀ վարչապետի խոսնակ Մանե Գեւորգյանը:

Հիեցնենք՝ այսօր համացանցում հրապարակվեց տեսանյութ, որը մեծ աղմուկ առաջացրեց: Դրանում երեւում է՝ ինչպես են մի խումբ ոստիկաններ ուժի կիրառմամբ բերման ենթարկում մի քաղաքացու: Վերջինս նշում էր, որ ինքը ինքնուրույն էլ կարող է գնալ, պետք չէ ուժ կիրառել: ՀՀ ոստիկանության լրատվական ծառայությունից մեզ հետ զրույցում ասացին, որ քաղաքացին բերման է ենթարկվել՝ ոստիկանության աշխատակիցների օրինական պահանջին չենթարկվելու համար:

Մանե Գեւորգյանի գրառումը՝ ստորեւ.

«Սիրելի հայրենակիցներ, հարգելի լրագրողներ, Հայաստանում կորոնավիրուսի տարածման տեմպերը շարունակում են մնալ մտահոգիչ։ Որպես իրավապահ մարմին՝ ՀՀ ոստիկանությունը պարտավոր է հետևել հակահամաճարակային կանոնների պահպանմանը։ Բոլոր այն քաղաքացիները, ովքեր չեն պահպանում դրանք, վտանգում են ոչ միայն իրենց, այլ նաև այլոց կյանքն ու առողջությունը։ Նման դեպքերում ոստիկանությունը պարտավոր է նախ հորդորել պահպանել կանոնները, իսկ ոստիկանների պահանջի նկատմամբ ակնհայտ արհամարհանքի դեպքում նաև կիրառել համաչափ ուժ։ Վարչապետն արդեն իսկ պահանջել է ոստիկանությունից կոշտ գտնվել իրենց պահանջը արհամարհող քաղաքացիների նկատմամբ։ Նման դեպքերում ոստիկանությունն իրավունք ունի գործել կտրուկ և չոր։ Խուսափելու համար նման սցենարից, կոչ ենք անում ենթարկվել հակահամաճարակային կանոններին և ոստիկանների պահանջներին»: