2021-02-23
«Մենք ձեզ սիրում ենք, սիրելի՛ ժողովուրդ»,- ասում է Միքայել Մելքումյանը
Մեկնարկել է «Հայրենիքի փրկության շարժման» երթը նոն – ստոպ անհնազանդության ակցիաների շրջանակում։ Երթը առաջնորդում են միասնական թեկնածու Վազգեն Մանուկյանը, Գեղամ Մանուկյանը, Իշխան Սաղաթելյանը։
Ակցիայի մասնակիցների շարքերում են «Բարգավաճ Հայաստան» խմբակցության պատգամավորներ Վահե Էնֆիաջյանը, Միքայել Մելքումյանը, Շաքե Իսայանը և այլոք։ ՀՀԿ ակտիվիստները նույնպես ներկա են հանրահավաքին, ի դեպ՝ Արփինե Հովհաննիսյանը այսօր եկել է ամուսնու հետ միասին։
«Սիրելի հայրենակիցներ, շատ մոտ է այն օրը, որ մենք ունենալու ենք առանց Նիկոլ Հայաստան»,- հավաքվածներին ոգևորեց Գեղամ Մանուկյանը։
Միքայել Մելքումյանը իր ելույթում շեշտեց՝ պետք է հասնել իշխանափոխության, քանի որ սկսել է արտագաղթ՝ մարդիկ լքում են հայրենիքը։
«Սիրելի՛ հայրենակիցներ, մի՛ լքեք Հայաստանը, մի՛ պատրաստվեք, որովհետև մենք պետք է միասին վերջին հարվածը հասցնենք։ Մենք ունենալու ենք լավ ապագա, որևէ մեկը մեր ազգային արժանապատվությունը չի կարող կոտրել։ Մենք պետք է շարժվենք հպարտ, բայց դրա համար պետք է պայմաններ ստեղծել բոլոր մեր համաքաղաքացիների համար, որ տներից դուրս գան։ Ամեն օր տանը, խոհանոցում, հեռուստացույցի առաջ, հարևանների հետ, բակերում բոլորը այս մասին խոսեն, թե ոնց պետք է հեռացնենք այս պաշտոնը զբաղեցնողին, որը իրական դավաճան է։ Համաշխարհային պատմության մեջ սա բացառիկ երևույթ է։ Մենք ձեզ սիրում ենք, սիրելի՛ ժողովուրդ»,- հանրությանը դիմեց Մելքումյանը՝ ընդգծելով, որ հայությունը համախմբված է և որևէ բան չի կարող իրենց այս ուղուց շեղել։
Քրիստինե Հովսեփյան
Նմանատիպ Նյութեր