Լոնդոնը նոր պատժամիջոցներ է սահմանել Ռուսաստանի դեմ

Մեծ Բրիտանիան Ռուսաստանի դեմ պատժամիջոցների լրացուցիչ փաթեթ է սահմանում Ուկրաինայի հետ պատերազմի պատճառով։ Այս մասին հայտնում է Meduza-ն՝ վկայակոչելով բրիտանական կառավարության կայքը։

Լոնդոնը խստացրել է ռուսական ինքնաթիռների թռիչքների ավելի վաղ սահմանված արգելքը։ Ռուսաստանի հետ կապված ցանկացած ինքնաթիռի մուտքը Միացյալ Թագավորության օդային տարածք այժմ կհամարվի քրեական հանցագործություն: Բրիտանական իշխանությունները կկարողանան կալանել նման ինքնաթիռները։

Բացի այդ, Մեծ Բրիտանիան արգելել է ավիացիոն և տիեզերական արտադրանքի և տեխնոլոգիաների արտահանումը Ռուսաստան:

«Մենք առաջին երկրներից էինք, որ արգելեցին ռուսական ինքնաթիռների թռիչքները։ Այսօր մենք ավելի հեռուն ենք գնացել՝ հանցանք դարձնելով նրանց համար թռչել Մեծ Բրիտանիայի օդային տարածքում», – ասվում է Մեծ Բրիտանիայի տրանսպորտի նախարար Գրանթ Շափսի հայտարարության մեջ։

Նա հավելել է, որ բրիտանական իշխանությունները կշարունակեն աշխատել «Պուտինին և նրա կամակատարներին զրկելու նորմալ կյանքով ապրելու հնարավորությունից, մինչ տուժում են անմեղ ուկրաինացիները»