Գերմանական E.ON խոշորագույն էներգետիկ կոնցեռնը հրաժարվել է ռուսական գազ գնելուց

Գերմանական խոշորագույն E.ON էներգետիկ կոնցեռնը հայտարարել է Եվրոպայում ռուսական «Գազպրոմի» առևտրային ընկերություններից գազի նոր գնումներից հրաժարվելու մասին։ Այս մասին հայտարարել է E.ON-ի գլխավոր գործադիր տնօրեն Լեոնարդ Բիրնբաումը, փոխանցում է ՏԱՍՍ-ը։

«Մենք մեր գազը գնում ենք Եվրոպայի մեծածախ շուկաներից։ E.ON-ը երկարաժամկետ մատակարարման պայմանագրեր չունի անմիջապես արտադրողների հետ: Այնուամենայնիվ, մեր պորտֆելում առկա բնական գազի փոքր քանակությունը ձեռք է բերվել «Գազպրոմի» եվրոպական առևտրային ընկերություններից… Ուկրաինայում պատերազմի պատճառով մենք դադարեցրել ենք այդ ընկերություններից նոր ծավալներ գնելը»,- ասվում է հայտարարության մեջ։

2021 թվականին Գերմանիա ռուսական գազի մատակարարումները գերազանցել են 50 միլիարդ խորանարդ մետրը, նշում է «Ինտերֆաքս»-ը։ Այս երկրում ռուսական գազի հիմնական գնորդներն են՝ Uniper, Wingas, WIEH, VNG, OMV-ը։

Ուկրաինա ռուսական ներխուժման ֆոնին բրիտանա-հոլանդական Shell ընկերությունը հայտարարեց Ռուսաստանից նավթի և գազի մատակարարման աստիճանական դադարեցման մասին։ Բրիտանական BP-ն հայտնել է, որ իրենք հրաժարվելու են ռուսական նավթի և գազի գնման նոր պայմանագրերից, սակայն կշարունակեն գնումները գործող պայմանագրերով։ Իր հերթին ԱՄՆ-ն արգելեց այդ էներգակիրների ներմուծումը, իսկ Մեծ Բրիտանիան հայտարարեց, որ կհրաժարվի դրանցից մինչև 2022 թվականի վերջ