Գերմանիան ընդունեց ծանր զինտեխնիկա Ուկրաինային տրամադրելու որոշում

Գերմանիայի խորհրդարանը՝ Բունդեսթագը, քվեների մեծամասնությամբ ընդունեց որոշում Ուկրաինային ծանր զինատեսակներ տրամադրելու մասին:

Պատգամավորները նշել են, որ ռազմական օգնությունը պետք է շարունակվի և հնարավորինս հզորանա:

Վերլուծաբաններն այս քվեարկության արդյունքը «պատմական» են անվանում, քանի որ Գերմանիան տասնամյակներ շարունակ պնդել է, որ ռազմական գործողությունների գոտիներ զենքի փոխադրումը միայն սրում է հակամարտությունները:

Գերմանիան Ուկրաինային կփոխանցի Gepard տեսակի ինքնագնաց հակաօդային զենիթային հատուկ տանկեր: Քննարկվում է նաև Leopard 2 տեսակի հրասայլեր Կիևին տրամադրելու հնարավորությունը:

Բունդեսթագի որոշման դեմ են քվեարկել Ձախ կուսակցությունը և «Այլընտրանք Գերմանիայի համար» կուսակցությունը, որի համոզմամբ` զենքի տրամադրումը գրեթե հավասարազոր է Ռուսաստանին պատերազմ հայտարարելուն:

Կանցլեր Օլաֆ Շոլցը նախկինում ասել է, թե Ռուսաստանը կարող է Ուկրաինա ծանր տեխնիկայի փոխադրումը որակել որպես ՆԱՏՕ-ի ներքաշում այս պատերազմի մեջ:

Այսօր Շոլցը ներկա չի եղել Բունդեսթագի նիստին, քանի որ պաշտոնական այցով մեկնել է Ճապոնիա: Ընդդիմությունը քննադատել է կանցլերին նման կարևոր խնդրի քննարկմանը չմասնակցելու համար:

Աղբյուրը՝ Azatutyun.am: