Էլիտար ընդդիմությունն իր էլիտար հանրահավաքով ապրում է կեղծ իրականության մեջ. Լ․ Մինասյան

«Էլիտար հանրահավաքներն ու Թալանի փրկության շարժումը: Երբ ենք տեսել վերջին 20 տարիների ընթացքում նման կահավորանքով և հատուկ համազգեստներով հանրահավաքներ։ Երբ էին Երևանի փողոցներում այսքան արագ տեղադրվում հատուկ ամրակալներով եռագույն վրաններ, երբ էր անձրևային եղանակին ցուցարարներին բաժանվում անձրևանոցներ, հատուկ կարված դիզայնով շապիկներ և դրոշների տեղատարափ։

Հատուկ բրենդավորված համազգեստները, վերջին տեխնոլոգիաներով զարգացած բեմահարթակը, տեսանկարահանող պրոֆեսսիոնալ թիմերը, նստացույցի հատվածում նստարաններն ու աթոռները, անընդմեջ թարմացվող ճաշացանկն ու միատեսակ գնված վառարանները։ Իհարկե այս ամենը զուգորդվում է վերջին մոդելի մեքենաների շքերթով, ցույցերի այսպես կոչված առաջնորդների անվտանգության աշխատակիցներով և գրպանային լրատվամիջոցների նախապես պլանավորած հարցերով։

Այս ծավալի ներդրումային նախագիծ գեթ մեկ անգամ արվեր Արցախում, որի «փրկության» համար են հավաքված այս մարդիկ։ Երեսպաշտությունն ու կեղծ հայրենասիրությունը, կենացային քաղաքականությունը զուգորդվող ատելության խոսքով և բռնության կոչերով երբեք հանրության լայն շրջանակներ չեն միավորել Հայաստանում։ Էլիտար ընդդիմությունն իր էլիտար հանրահավաքով ապրում է կեղծ իրականության մեջ»,- գրել է ՀՀ ԱԺ «Քաղաքացիական պայմանագիր» խմբակցության պատգամավոր Լիլի Մինասյանը։