Վրաստանը կարող է և՛ նպաստել, և՛ մեծապես օգտվել TRIPP-ից. Պետդեպ

Ըստ վրացական ընդդիմադիր «Netgazeti» պարբերականի, ԱՄՆ պետդեպարտամենտը հայտարարել է, որ ԱՄՆ-ն քննարկում է այն քայլերը, որոնք կարող է ձեռնարկել Վրաստանի կառավարությունը՝ երկրների միջև հարաբերությունները ամրապնդելու և առաջ մղելու համար։

«Միացյալ Նահանգները 33 տարի շարունակ եղել է Վրաստանի և վրաց ժողովրդի համար նախընտրելի գործընկեր։ Մենք շարունակում ենք մնալ Վրաստանի անկախության, ինքնիշխանության և տարածքային ամբողջականության ամուր կողմնակից։ Միացյալ Նահանգները սպասում է Վրաստանի հետ կառուցողական հարաբերությունների։

Նախագահ Թրամփի միջնորդությամբ Հայաստանի և Ադրբեջանի միջև կնքված խաղաղության համաձայնագիրը վերափոխման հնարավորություն է ընձեռում ամբողջ Հարավային Կովկասի համար։ Վրաստանը կարող է և՛ նպաստել, և՛ մեծապես օգտվել այս համաձայնագրի հնարավոր կայունությունից և բարգավաճումից։

Մենք կշարունակենք համագործակցել Վրաստանի կառավարության հետ այն հարցերի շուրջ, որոնք ազդում են մեր երկկողմ հարաբերությունների և Վրաստանի քաղաքական միջավայրի վրա։ Մենք նաև կքննարկենք այն կոնկրետ քայլերը, որոնք Վրաստանի կառավարությունը կարող է ձեռնարկել՝ ցույց տալու համար իր հանձնառությունը մեր երկրների միջև հարաբերությունները ամրապնդելու և առաջ մղելու հարցում», – ասվում է ԱՄՆ պետդեպարտամենտի կողմից «Netgazeti»-ին տված հայտարարության մեջ։