ՀՀ քաղաքացու մասին խոսելիս լինել զգույշ, լինել զուսպ ու գլխից մեծ բողկեր չուտել․ Վ․ Ալեքսանյան

««Ելեք․․․ հակառակ դեպքում թքեք ձեր երեսին»․ այս խոսքերով դիմեց դաշնակցական պատգամավոր Գեղամ Մանուկյանը ուսանողներին։

«Չեն գալիս, ջանդամին գան»․ այս խոսքերով բնութագրեց իրենց չմիացող քաղաքացիներին Քոչարյանի խմբակցության պատգամավոր Գեղամ Նազարյանը։

Եվ այս երկու արտահայտությունները լավագույնս բնութագրում են, թե ի՞նչ է իրենից ներկայացնում ուսանողը, դասախոսը, վարորդը, քաղաքացին Քոչարյանի և Վանեցյանի թիմակիցների համար՝ բիոզանգված, որի վրա կարելի է թքել, կարելի է ջանդամի ծոցը ուղարկել, եթե քեզ չի միանում, միանալու դեպքում էլ «հեծել» ու հարստահարել։ Սա է իրականությունը և ոչինչ ավելի։

Այնուամենայնիվ սակավամարդ էլիտար ցույցերի առաջնորդներին հստակ հորդորում եմ՝ Հայաստանի Հանրապետության քաղաքացու մասին խոսելիս լինել զգույշ, լինել զուսպ ու գլխից մեծ բողկեր չուտել։ Մի սադրեք ու մի դրդեք քաղաքացիներին ձեր բառամթերքը դնել գործողության մեջ։

Սիրելի ուսանողներ, սիրելի քաղաքացիներ, խնդրում եմ չտրվել մեծ բողկերի սիրահարների սադրանքներին, նրանց ուզածը ձեզ բախումների մեջ ներքաշելն է, այլ նպատակ Երևանում շրջող մի քանի տասնյակ ակտիվիստների առաջնորդները չունեն»,-գրել է ՀՀ Ազգային ժողովի «Քաղաքացիական պայմանագիր» խմբակցության պատգամավոր Վահագն Ալեքսանյանը։