Ուկրաինայի նախագահը համաշխարհային դրամահավաք է սկսում

Ուկրաինայի նախագահ Վլադիմիր Զելենկին նախաձեռնում է համաշխարհային դրամահավաք: Նվիրատվությունները կուղղվեն Ռուսաստանի ագրեսիան դիմագրավելու և երկիրը պատերազմից հետո վերակառուցելու խնդիրներին:

Դրամահավաքի մասին Զելենսկին հայտնել է Twitter-ում այսօր տեղադրած անգլերեն տեսաուղերձով:

Զելենսկու փոխանցմամբ, այս նախաձեռնությունն ամբողջ աշխարհի շարքային մարդկանց թույլ կտա միանալ Ռուսաստանի բանակի հարձակման դեմ Ուկրաինան պաշտպանելու առաքելությանը:

«Ցանկացած նվիրատվություն նշանակություն ունի հաղթանակի համար»,- ասվում է Վլադիմիր Զելենսկու ուղերձում:

Դրամահավաքի կայքում նշվում է, որ նվիրատվությունները կուղղվեն երեք հիմնական նպատակների՝ պաշտպանությանը և ականազերծմանը, առողջապահությանը և երկրի վերակառուցմանը:

«Միայն միասին մենք կարող ենք կանգնեցնել այս պատերազմը և վերակառուցել այն, ինչ Ռուսաստանը քանդել է»,- ասվում է Զելենսկու ուղերձում:

Աղբյուրը՝ Azatutyun.am: