Կառավարությունն ԱԱԾ-ին՝ ներքին անվտանգությունն ուժեղացնելու նպատակով կհատկացնի 333.6 մլն դրամ

Այսօր` մայիսի 13-ին կայացած Կառավարության հերթական նիստում հավանություն տրվեց ներքին անվտանգությունն ուժեղացնելու նպատակով ԱԱԾ-ին 333.6 մլն դրամ հատկացնելուն` լրացուցիչ ֆինանսավորումն էլ կուղղվի ՀՀԾ-ին:

Սահմանված գումարից միայն 14 մլնն է ուղղվելու հետախուզական, հակահետախուզական, ռազմական հակահետախուզության, հանցագործությունների դեմ պայքարի  և պետական սահմանի պահպանության գործունեության կազմակերպմանը, իսկ մնացած գումարն ուղղվելու է ազգային անվտանգության համակարգի տեխնիկական հագեցվածության բարելավմանը:

 «Նախագծով առաջարկվում է 2022 թվականի պետական բյուջեով նախատեսված Կառավարության պահուստային ֆոնդից Հայաստանի Հանրապետության ազգային անվտանգության ծառայությանը հատկացնել գումար` ՀՀ ազգային անվտանգության ծառայության բնականոն գործունեության համար համապատասխան ծառայությունների ձեռքբերման նպատակով»,- ասվում է նախագծի հիմնավորման մեջ: