Անհապաղ դադարեցնել սխալ տվյալների տրամադրումը հեռուստաշուկային. միջազգային աուդիտը՝ հեռուստալսարանի չափումների մասին

Հայաստանում հեռուստատեսային լսարանի չափումներով զբաղվող միակ` «Ադմոսֆեր Արմենիա» ընկերությունում «Մեդիահաուզ Արմենիա» ընկերության պատվերով իրականացվել է միջազգային աուդիտ:

Ըստ մասնագիտացված միջազգային աուդիտորական 3M3A ընկերության  եզրափակիչ եզրակացության՝ «Ադմոսֆեր Արմենիայի» համակարգը չի համապատասխանում միջազգային չափանիշներին: Այն հիմնովին թերի է, և անհնար է հիմնվել նրա տրամադրած չափումների վրա՝ որպես շուկայական արժույթի:

Այս եզրակացության համաձայն՝ «Ադմոսֆեր Արմենիայի» հեռուստալսարանի չափումները չեն կարող համարվել օբյեկտիվ և վավեր, ուստի պետք է անհապաղ դադարեցնել սխալ տվյալների տրամադրումը հեռուստաշուկային: 

Նման եզրակացությամբ հարցականի տակ են առնվում տարիներ շարունակ հեռարձակման և գովազդի ոլորտներում՝

• գովազդատուների կատարած ծախսերի և դրանց արդյունքում ձևավորված եկամուտների իրական հարաբերակցությունը.

• կատարած ներդրումների և գովազդից ստացած արդյունքի հիման վրա բիզնեսի հետագայի մասին կայացրած որոշումների ճշգրտությունը.

•  արտադրված հեռուստանախագծերում կատարված ներդրումները, դրանց վարկանիշների հիման վրա կատարված կարգավորումներն ու կայացված որոշումները.

•  գովազդատուների միջև արդար մրցակցային դիրքերի դասավորությունը շուկայում:

Ելնելով վերոգրյալից, ինչպես նաև հաշվի առնելով վարկանիշային տվյալների կենսական նշանակությունը ոլորտի համար՝ «Մեդիահաուզ Արմենիա» ընկերությունը կոչ է անում հեռուստագովազդային գործունեության հետ առնչվող բոլոր ընկերություններին հետևություններ անել այս ամենից:

Միևնույն ժամանակ, այս խնդիրն արդեն ներկայացվել է նաև ԱԺ համապատասխան գլխադասային հանձնաժողովին, և առաջիկայում ակնկալվում են դրան իրավական կարգավորում տալու նպատակով քննարկումներ սկսել:

Հետագա զարգացումների մասին լրացուցիչ կտեղեկացվի:

Աուդիտի ամբողջական եզրակացությունը՝ ստորև:

Աղբյուրը՝ 1lurer.am: