Ստեփանակերտն անընդունել է համարում Շառլ Միշելի ձևակերպումը

Արցախի նախագահի խոսքով՝ վարչապետ Փաշինյանն իրեն ասել է, որ «որևէ մեկը չի կարող և չի պատրաստվում Հայաստանի ու Արցախի ժողովրդի թիկունքում ինչ-որ փաստաթուղթ ստորագրել, եթե կլինի կոնկրետ առաջարկ կոնկրետ լուծումների մասին, ապա այն կքննարկվի Արցախի իշխանությունների հետ, և հանրությունը դրա մասին տեղեկացված կլինի պատշաճ ձևով»: Այս մասին Արայիկ Հարությունյանը հայտարարել է այսօր Ստեփանակերտում տեղի ունեցած Անվտանգության խորհրդի ընդլայնված նիստին։

Այդ նիստը, ինչպես նշում է Արցախի նախագահի մամլո ծառայությունը, հրավիրվել է խորհրդարանում ներկայացված քաղաքական կուսակցությունների պահանջով։ Նախագահ Հարությունյանը, մասնավորապես, հայտարարել է, որ «Արցախի իշխանությունների և ժողովրդի համար խիստ անընդունելի է Եվրոպական խորհրդի նախագահ Շառլ Միշելի հայտարարության մեջ տեղ գտած «Ղարաբաղի էթնիկ հայ բնակչության իրավունքներն ու անվտանգությունը» ապահովելու մասին ձևակերպումը»։

Արցախի առաջնորդի խոսքերով՝ Եվրամիության բարձրաստիճան պաշտոնյայի հայտարարությունը «չի արտահայտում արցախահայության պահանջներն ու ձգտումները, որոնց հիմքում դրված է ժողովուրդների ինքնորոշման իրավունքը»։

«Նախագահ Հարությունյանը շեշտադրել է, որ Արցախի Հանրապետությունը անշեղորեն շարունակում է իր ժողովրդի ինքնորոշման իրավունքի լրիվ ու անվերապահ իրացման միջոցով անկախության միջազգային ճանաչման ուղին, և արցախցիների իրավունքների ու անվտանգության պատշաճ ապահովումը հնարավոր է բացառապես Ադրբեջանի կազմից դուրս»,- ասվում է պաշտոնական հաղորդագրությունում։