Լուվրում տղամարդը տորթով ներկել է Լեոնարդո դա Վինչիի «Ջոկոնդա»-ի պաշտպանիչ ապակին

Կիրակի օրը՝ մայիսի 29-ին, տարեց կնոջ հագուստով մի տղամարդ հաշմանդամի սայլակով եկել է թանգարան, մոտեցել դա Վինչիի աշխատանքին, որը հայտնի է նաև որպես Մոնա Լիզա, և սկսեl տորթ քսել նկարը ծածկող պաշտպանիչ ապակու վրա: Հետո նա վարդեր է շաղ տվել դահլիճում։
Նրան ոստիկանությունը բերման է ենթարկել, գրում է BFM-ը, նա ասել է, որ «պետք է մտածել Երկրի մասին»։ Հավանաբար, ենթադրում են լրատվամիջոցները, խոսքը ինչ-որ «բնապահպանների ակցիայի» մասին է։

Լուվրի ղեկավարությունը և իրավապահ մարմինները դեռևս չեն մեկնաբանել կատարվածը։ Միջադեպի մասին հայտնի է դարձել սոցցանցերում ականատեսների հրապարակումներից։
«Մոնա Լիզան»՝ աշխարհի ամենահայտնի կտավներից մեկը, բազմիցս դարձել է վանդալների հարձակումների առարկա։

1956 թվականին Լուվրի այցելուներից մեկը թթու է լցրել նկարի վրա։ Նույն թվականին նկարի վրա քար են նետել՝ վնասելով ներկի շերտը։ Դրանից հետո դա Վինչիի աշխատանքը ծածկվել է զրահակայուն ապակիով։ 1974 թվականին, երբ Տոկիոյում ցուցադրվում էր Մոնա Լիզան, այցելուն փորձել է ներկ շաղ տալ նկարը ծածկող ապակիի վրա: 2009 թվականին Ռուսաստանի քաղաքացին գավաթ է նետել դա Վինչիի նկարի վրա, որը հետագայում բացատրել է իր արարքը Ֆրանսիայի քաղաքացիություն ստանալուց հրաժարվելով։

«Ջոկոնդան» նույնիսկ գողացել են. 1911 թվականին նկարը Լուվրից գողացել է իտալացի դեկորատոր Վինչենցո Պերուջիան։ Ավելի ուշ նա հայտարարել է, որ ցանկանում է իտալացի նկարչի աշխատանքը վերադարձնել Իտալիա։ Նկարը հայտնաբերվել է երկու տարի անց։

Աղբյուրը՝ Meduza-ի։
Թարգմանությունը՝ Աստղ Խաչատրյանի։