Դատախազը մերժել է Ա․ Չալաբյանի խափանման միջոցի փոփոխության վերաբերյալ երաշխավորությունները

Մոտ մեկ ամիս առաջ կալանավորված  Ավետիք Չալաբյանի պաշտպանական խումբը նրա նկատմամբ կիրառված խափանման միջոցի փոփոխության վերաբերյալ երաշխավորություններով դիմել էր ՀՀ գլխավոր դատախազություն: 

Դատախազը մերժել է Չալաբյանի խափանման միջոցի փոփոխության վերաբերյալ երաշխավորությունները:

Նշենք, որ երաշխավորների թվում էին ՀՀ Աժ պատգամավորներ Սեյրան Օհանյանը, Իշխան Սաղաթելյանը, Էլինար Վարդանյանը, Հայկ Մամիջանյանը, Տիգրան Աբրահամյանը, ՀՀ նախկին փոխվարչապետ Վաչե Գաբրիելյանը և «Արար» հիմնադրամը։

Հայտարարությունում մասնավորապես նշվում է. 

Դատախազը, որոշման հիմքում նշել է, որ «նախաքննության ներկա փուլում չեն վերացել և պահպանվել են մեղադրյալ Ա․ Չալաբյանի կալանքի տակ պահելու հիմքերն ու պայմանը և վարույթն իրականացնող մարմինը գտնում է, որ տվյալ փուլում ևս կալանավորումից բացի որևէ այլ խափանման միջոց չի կարող գործուն երաշխիք հանդիսանալ մեղադրյալի պատշաճ վարքագիծն ապահովելու համար»։

Հիշեցնենք, որ «Համախմբում» շարժման անդամ Ավետիք Չալաբյանին  մեղսագրվում է ՀՀ քրեական օրենսգրքի 163-րդ հոդվածի 3-րդ մասի 2-րդ կետով նախատեսված արարքը (Հավաք անցկացնելուն կամ դրան մասնակցելուն խոչընդոտելը, հավաքին մասնակցելուն հարկադրելը կամ հավաքին մասնակցելու կամ հավաքին մասնակցելուց հրաժարվելու նպատակով նյութապես շահագրգռելը)։

Վերջինս ձերբակալվել է մայիսի 13-ին՝ ընդդիմության հանրահավաքներին Ագրարային համալսարանի ուսանողների մասնակցության համար նյութապես շահագրգռելու կասկածանքով:

Հիշյալ դեպքի վերաբերյալ 2022 թվականի մայիսի 9-ին լրատվական կայքերից մեկում ձայնագրություն էր հրապարակվել՝ «1000 դրամ յուրաքանչյուր ուսանողի համար, Ագրարային համալսարանի դասախոսը դրդում է ուսխորհրդի նախագահին գումարի դիմաց կազմակերպել, որպեսզի ուսանողները մասնակցեն ընդդիմության հավաքներին՝ յուրաքանչյուր ուսանողի դիմաց առաջարկելով 1000 դրամ» վերտառությամբ: