Վերջին 40 օրերը ընդդիմության գործողությունները ամփոփելով՝ կարելի է փաստել, որ խորհրդարանական ընդդիմությունը դեֆոլտի մեջ է , ընդիդմությունը չի կարողանում սպասարկել իր պարտականությունները ոչ մի ոլորտում: Այս մասին Ազգային ժողովում իր ելույթում ասել է «Քաղաքացիական պայմանագիր» խմբակցության ղեկավար Հայկ Կոնջորյանը։
«Մենք տեսանք ընդդիմության տխուր ճակատագիրը այս վերջին շաբաթների ընթացքում, որն ամփոփվեց այսօր՝ Ֆրանսիայի հրապարակը գլխիկոր ազատելով։ Ընդդիմությունը փորձում էր արցախյան հարցը օգտագործել՝ իշխանությունը վերստին զավթելու համար»,- ասաց նա և հավելեց, որ ընդդիմությունը ձախողել է:
«Ընդդիմությունը ինչ-որ իմաստով Արցախի հարցը, Արցախին վերցրել է պատանդ և պատանդ պահելով Արցախին՝ փորձում է անընդհատ Հայաստանում իշխանություն զավթել»,- ասաց նա:
Հայկ Կոնջորյանն ասաց, որ ընդդիմադիրների քաղաքական սնանկությունը արձանագրված է ոչ միայն այս դահլիճում, այլև ՀՀ փողոցներում ու հրապարակներում: Նա նկատեց, որ ՔՊ պատգամավորներն իրենց տեղում են, իսկ Իշխան Սաղաթելյանը ոչ իր տեղում է, ոչ էլ փողոցում է: «Ուր է Իշխան Սաղաթելյանը, և ուր ենք մենք»,- ասաց նա:
Պատգամավորն ասաց, որ քաղաքական լոպազությունը և դրա մարաթոնը, որը տեղի էր ունենում վերջին օրերին, իրականում սնանկ էր: «Տպավորություն էր, որ պատրաստ են անգամ ողջակիզվել Ֆրանսիայի հրապարակում տեղադրված մանղալների մեջ, հետո դրա միջից ֆենիքսի պես մոխիրներից վեր հառնել: Ընդդիմության այս տխուր վերջաբանը և տապալումը վկայում է Հայաստանում ժողովրդավարության հաղթանակի մասին»,- ասաց նա:
