Պետբյուջեից մարզպետարաններին կտրամադրվի 268.5 միլիոն դրամ

Կառավարությունն այսօր ընդունեց ՏԿԵ նախարարության նախագիծը, ըստ որի՝ առաջարկվում է պետական բյուջեից համաֆինանսավորմամբ մարզպետարաններին տրամադրել 268.5 միլիոն դրամ՝ սուբվենցիոն ծրագրերի համար գումար հատկացնելու ակնկալիքով: Նախագիծը Կառավարության նիստին ներկայացրեց ՀՀ ՏԿԵ նախարար Գնել Սանոսյանը:

«Դրանք վերաբերում են 18 բնակավայրի 20 սուբվենցիոն ծրագրերին: Ըստ մարզերի բաշխվածությունը հետևյալն է՝ Արարատի մարզում 3 ծրագիր՝ 54 միլիոն դրամ, Արմավիրի մարզում 6 ծրագիր՝ 81 միլիոն դրամ, Գեղարքունիքի մարզում 5 ծրագիր՝ 181 միլիոն դրամ, Կոտայքի մարզում 2 ծրագիր՝ 202 միլիոն դրամ, Լոռու մարզում 2 ծրագիր՝ 35 միլիոն դրամ, Շիրակի մարզում 1 ծրագիր՝ 4.6 միլիոն դրամ, Սյունիքի մարզում 1 ծրագիր՝ 53 միլիոն դրամ»,- ասաց Սանոսյանը:

Նախարարի խոսքով գումարը հիմնականում օգտագործվել է ասֆալտապատման, համայնքներում այգիների, պուրակների, խաղահրապարակների, խմելու ջրի, կոյուղու և այլ խնդիրների լուծման համար: 

Սանոսյանը հայտնեց, որ ծրագրերը բոլորն ավարտված են:

«Կառավարության պարտավորությունն ենք իրականացնում՝ շինարարներին իրենց աշխատանքի համար վճարելով»: