Քաղաքապետը տրանսպորտային համակարգում խնդիրները լուծված լինելու առաջիկա ժամկետներ է նշել

Երևան համայնքի 2022 թվականի բյուջեով 6 միլիարդ 342 միլիոն 503 հազար դրամ կուղղվի 15 միավոր տրոլեյբուսների և 150 միավոր ավտոբուսների ձեռք բերման համար:

Այս մասին այսօր Երեւանի ավագանու նիստի ժամանակ հայտնեց քաղաքապետ Հրաչյա Սարգսյանը:

Քաղաքապետը նաեւ ասաց, որ այս տարի լրանում է 249 «Հայգեր» մակնիշի ավտոբուսների շահագործման 10 տարին, եւ տեխնիկական խնդիրները լուծելու համար Չինաստանից պահեստամասեր կբերվեն Հայաստան:

«Մինչև 2023 թվականի ավարտը տրանսպորտային համակարգում խնդիրները 70-80 տոկոսով լուծված կլինեն: Հիմա օրենսդրական փոփոխություններ ենք իրականացնում, որպեսզի մասնավոր կազմակերպություններին տրանսպորտի շահագործման գործընթացին ներգրավենք: Նախագիծը պատրաստ է, և մինչ տարվա մեջ այդ փոփոխությունը կլինի: Այն մեզ հնարավորություն կտա հայտարարել մրցույթ՝ նոր, հավելյալ շարժակազմ ձեռք բերելու համար»,- վստահեցրեց Սարգսյանը:

Քաղաքապետի փոխանցմամբ՝ 2023 թվականի մարտ-ապրիլ ամիսներին 87 միավոր 12 մետրանոց ավտոբուս է լինելու Երեւանում: