Գործ ունենք բաց տեքստով սպառնալիքի հետ․ Ռ․ Մեհրաբյան

ՌԴ ԱԳՆ-ն հայտարարել էր, որ եթե ​​մոտ ապագայում Լիտվայի տարածքով Կալինինգրադի մարզի և Ռուսաստանի Դաշնության մնացած տարածքների միջև բեռնափոխադրումը ամբողջությամբ չվերականգնվի, ապա Ռուսաստանը իրեն իրավունք է վերապահում միջոցներ ձեռնարկել իր ազգային շահերը պաշտպանելու համար։ Քաղաքագետ Ռուբեն Մեհրաբյանը Թիվ 1-ին պարզաբանել է, թե ինչ է սա իրենից ենթադրում և ինչ ռիսկեր ու սպառնալիքներ են ներկայացնում։

-Ի՞նչ է սա նշանակում․ արդյո՞ք Ռուսաստանը տողատակով ակնարկում է ռազմական միջամտությամբ ցանկալի լուծման հասնելու նախաձեռնության հավանականություն։

-Ես կարծում եմ, որ այստեղ գործ ունենք բաց տեքստով սպառնալիքի հետ։ Սպառնալիք է ուղղված ոչ միայն Լիտվային, այլևս ողջ Հյուսիսատլանտյան դաշինքին, ինչի հետ կապված ԱՄՆ պետդեպարտամենտի խոսնակն է հայտարարությամբ հանդես եկել, հիշեցնելով ՆԱՏՕ-ի 5-րդ հոդվածի մասին, որը նշանակում է, որ հարձակումը ՆԱՏՕ-ի անդամ ցանկացած երկրի դեմ դիտարկվում է հարձակում ամբողջ դաշինքի դեմ։ Հետևապես Լիտվան այո՛ անմիջական սպառնալիքի ներքո է և Ռուսաստանի կողմից այդ հայտարարությունները հենց դրա դրսևորումներն են։ Մնացածն էլ տեսնենք ինչ զարգացումներ կունենա, բայց ի՞նչ պիտի անի Ռուսաստանը, պատերազմ հայտարարի՞, առանց այն էլ Ռուսաստանի գործերը մեղմ ասած ամենևին էլ լավ չեն Ուկրաինայի հետ ճակատում, նա կստանա երկրորդ ճակատը և հաստատապես ամենաողբերգական հետևանքներով հենց իր համար։

-Լիտվան արգելք է դրել իր տարածքով դեպի Կալինինգրադի մարզ ապրանքների երկաթուղային տարանցման համար, որոնք ընկել են եվրոպական պատժամիջոցների տակ։ Լիտվայի արտաքին գործերի նախարար Գաբրիելիուս Լանդսբերգիսը հայտարարել է, որ սահմանափակումները մտցվել են Եվրահանձնաժողովի հետ խորհրդակցելուց հետո եվ նրա ղեկավարությամբ․ Ո՞րն է այս քայլի քաղաքական ենթատեքստը

Ենթատեքստ չկա, այստեղ ուղիղ տեքստ է Եվրամիությունը որոշում է ընդունել պատժամիջոցների վերաբերյալ, Լիտվան Եվրամիության անդամ է և Լիտվան հետևում է միության համատեղ որոշված ոգուն և տառին, վերջ այստեղ ենթատեքստ չկա։