Այսօր կառավարության հերթական նիստին որոշում կայացվեց Հայաստանի 3 մարզերի 27 բնակավայրում ջրագծերի շինարարության համար հատկացնել 2 մլրդ 468 մլն դրամ:
Այսպիսով, նախատեսվում է այդ գումարով «Վեոլիա Ջուր» ՓԲԸ-ի սպասարկման տարածքում գտնվող համայնքների ջրամատակարարման համակարգերի վերակառուցման ծրագրի շրջանակներում 2022թ համար իրականացնել շինարարական աշխատանքներ։
Վարչապետ Նիկոլ Փաշինյանը, անդրադառնալով համակարգի խնդիրներին ասաց, որ երկու ուղղությամբ կորուստներ կան և բաց թողնված հարյուր լիտր ջրից նշանակության կետ հասնում է 30 , 40 կամ 20: «Թե´ ոռոգման, թե´ խմելու ջրի ամենամեծ պրոբլեմը կորուստներն են: Կա կորուստների երկու ուղղություն՝ վարչարարության կորուստներ՝ չֆիքսված գծեր, ստվերային գործարքներ, բայց հիմնական մասը նրանից է, որ ջրի մատակարարման համակարգը մաշված, քայքայված է, այսինքն ջուրը խողովակով գնալու փոխարեն լցվում է հողի մեջ, տեղ չի հասնում»,- ասաց նա:
