Կառավարությունը 2 միլիարդ 734 միլիոն դրամ հատկացրեց Ստեփանավան-Յաղդան, Սիսիան-Դաստակերտ և Տաթև-Աղվանի հատվածների ճանապարհաշինարարական աշխատանքները իրականացնելու համար։ Նախագիծը Կառավարության օգոստոսի 11-ի նիստի ժամանակ ներկայացրեց Տարածքային կառավարման և ենթակառուցվածքների նախարար Գնել Սանոսյանը։
«Ներկայացվող նախագծով առաջարկում ենք ՀՀ պետական բյուջեի մասին օրենքում կատարել լրացումներ և փոփոխություններ և երեք հատվածներում իրականացնել կամ ավարտել ճանապարհաշինարարական աշխատանքները (Ստեփանավան-Յաղդան, Սիսիան-Դաստակերտ և Տաթև-Աղվանի հատվածների)։
Ընդհանուր առմամբ՝ նախագծով 2 միլիարդ 734 միլիոն դրամ է նախատեսված, որից 2 միլիարդ 609 միլիոն դրամը շինարարական աշխատանքների համար, 25 միլիոն դրամը տեխնիկական հսկողության համար, 19 միլիոնը դրամը հեղինակային հսկողության համար»,- ասաց Սանոսյանը։
Վարչապետ Նիկոլ Փաշինյանը անդրադարձավ Տաթև-Աղվանի ճանապարհահատվածին՝ նշելով, որ նախորդ տարվա վերջին այդ ճանապարհը ֆորսմաժորային իրավիճակում շահագործման հանձնվեց, հետագայում ճանապարհը շատ լուրջ խնդիրներ ունեցավ։
«Եվ մենք, ըստ էության, տարվա սկզբից սկսեցինք աշխատել այդ ուղղությամբ, և հիմա իմ ունեցած վերջին տեղեկություններով խնդիրները մեծ լուծվել է, և մնացել է 500 մետրանոց մի հատված, որտեղ այդ փոսերի հարցը պետք է լուծենք»,- ասաց վարչապետը։
Գնել Սանոսյանը իր հերթին նշեց, որ Տաթև-Աղվանի ճանապարհահատվածում 500 մետրից ավելի քիչ հատված է մնացել և հավանաբար օգոստոսի 12-ից փոսերը կվերացվեն և կարվի ասֆալտապատում։
«Երրորդ շերտի ասֆալտապատման գործընթացը սկսվել է, մոտ 5,8 կիլոմետր արդեն արվել է։ Եթե հասցնենք, հաջորդ Կառավարության նիստում մյուս շինարարական ընկերությանը գումար կհատկացնենք այնտեղի վերջին շերտի համար»,- ասաց Սանոսյանը։
