Վիզուալ տեղեկությունը, որ մենք ունենք, գրեթե բացառում է ահաբեկչությունը. վարչապետ

Տեսագրություններից ակնհայտ է դառնում, որ ահաբեկչական որևէ գործողության տրամաբանությունը բացառվում է, որովհետև տեսնում ենք, որ ծուխ կա, փախչող մարդիկ կան, որից հետո տեղի է ունեցել պայթյուն։

Այս մասին այսօր Կառավարության նիստի ժամանակ ասաց ՀՀ վարչապետ Նիկոլ Փաշինյանը՝ անդրադառնալով օգոստոսի 14-ին «Սուրմալու» առևտրի կենտրոնում տեղի ունեցած պայթյունի հնարավոր պատճառներին:

«Բացի այդ, վիզուալ տեղեկատվությունը, որ մենք ունենք, գրեթե բացառում է ահաբեկչության հանգամանքը։ Նման դեպքից հետո առաջին հարցը, որ ինձ մոտ ծագում է, այն է, թե ինչ չենք արել, որպեսզի կարողանայինք բացառել նման զարգացումը։ Դեռևս 2020 թ-ի օգոստոսին Բեյրութում տեղի ունեցած պայթյունից հետո ես հանձնարարական եմ տվել համապատասխան գերատեսչություններին հավաքել տեղեկատվություն բոլոր այն օբյեկտների, ընկերությունների վերաբերյալ, որոնք գործ ունեն պայթյունավտանգ իրերի հետ։

Դեպքից հետո հաշվետվություն եմ ստացել հանձնարարականի վերաբերյալ։ Այս պահի դրությամբ գիտենք, որ առևտրի կենտրոնում հրդեհային և տեխնիկական տեսչական մարմինը կատարել է ստուգումներ: Ենթադրում եմ, որ այդ հանձնարարականի շրջանակներում և արձանագրել խախտումներ»,- ասաց Կառավարության ղեկավարը։

Նա հանձնարարեց ՊՎԾ պետին ուսումնասիրություն իրականացնել և զեկուցել, թե ինչպես է կատարվել այն:

Քննչական կոմիտեի ղեկավար Արգիշտի Քյարամյանի խոսքով էլ՝ քրեական գործում առկա ապացույցները վկայում են, որ գործ ունենք անզգուշությամբ տեղի ունեցած հանցագործության հետ։