Չինաստանը կարող է խաղաղապահներ ուղարկել Ուկրաինա. աշխարհաքաղաքական խաղը մտնում է նոր փուլ

Ուկրաինայում անցկացված վերջին սոցիոլոգիական հարցումն արձանագրել է հետևյալ պատկերը՝ երկրի բնակիչների 50%-ը որևէ պայմանով պատրաստ չէ տարածքային զիջումների, նույնիսկ եթե դա նշանակում է պատերազմի շարունակություն։ 39%-ը համարում է, որ խաղաղության հասնելու և անկախությունը պահպանելու նպատակով որոշ տարածքներից կարելի է հրաժարվել։ Այս մասին գրել է Meduza-ն։

Խաղաղապահներ Ուկրաինայում. Չինաստանի հնարավոր ներգրավումը
Գերմանական Die Welt պարբերականի տվյալներով՝ Չինաստանը հնարավոր է դիտարկում է միանալ այսպես կոչված «ցանկացողների կոալիցիային»՝ մի խումբ արևմտյան երկրներ, որոնք քննարկում են Ուկրաինա խաղաղապահ ուժեր ուղարկելու հարցը՝ որպես հնարավոր խաղաղ համաձայնագրի ապահովման միջոց։

ԵՄ-ի հետ քննարկումներին ծանոթ դիվանագետների տեղեկություններով՝ Բրյուսելում տեղակայված չինացի դիվանագետները արդեն իսկ դիմել են Եվրամիության ներկայացուցիչներին՝ պարզելու, թե արդյոք Չինաստանի զինված ուժերը կարող են միանալ Ուկրաինայում խաղաղապահ առաքելությանը։

Die Welt-ի աղբյուրները նշում են, որ Չինաստանի հնարավոր մասնակցությունը կարող է նպաստել նրան, որ Ռուսաստանը համաձայնի օտարերկրյա խաղաղապահների տեղակայմանը Ուկրաինայում։ Նշենք, որ Մոսկվան նախկինում կտրականապես մերժում էր նման նախաձեռնությունները։ «Սակայն սա ցանկացած պարագայում շատ նուրբ հարց է», – գրում է պարբերականը։

Վաշինգտոնում այս գաղափարը հավանության կարող է արժանանալ։ The Economist-ը դեռևս փետրվարին գրել էր, որ ԱՄՆ իշխանությունների կարծիքով Ուկրաինայում խաղաղապահ առաքելությունը չպետք է միայն եվրոպական երկրների վրա հիմնված լինի, այլ պետք է ներառի նաև երրորդ երկրներ՝ Չինաստան, Բրազիլիա և այլն։

Մեծ Բրիտանիան ու Ֆրանսիան՝ կոալիցիայի առաջատար երկրները, ակնկալում են, որ մոտ 30 պետություն կցանկանա միանալ նախաձեռնությանը։ Բայց դեռևս հստակ չէ, թե վերջնականապես քանի երկիր կմիանա և ինչ դերակատարումներ կունենան։ Մեծ Բրիտանիայում անգամ քննարկվում է Ուկրաինայի օդային տարածքը պաշտպանելու համար կործանիչների ուղարկումը։

Մյուս կողմից, Ֆրանսիայի նախագահ Էմանուել Մակրոնը դիտարկում է նաև ՄԱԿ-ի խաղաղապահների ուղարկման տարբերակը՝ որպես այլընտրանք։ Նա այդ թեման քննարկել է ՄԱԿ-ի գլխավոր քարտուղար Անտոնիու Գուտերեշի հետ մարտի 20-ին կայացած ԵՄ գագաթնաժողովի ժամանակ։ Սակայն նման առաքելություն իրականություն դառնալու համար անհրաժեշտ է ՄԱԿ-ի Անվտանգության խորհրդի համաձայնությունը, որին հնարավոր է դիմադրեն Ռուսաստանը և նույնիսկ ԱՄՆ-ը։

Մեծ Բրիտանիայի ու Ֆրանսիայի ներկայացուցիչները վերջին շաբաթներին մի քանի հանդիպում են անցկացրել այս թեմայով։ Ինչպես հայտնել է Մակրոնը, «ցանկացողների կոալիցիայի» հաջորդ գագաթնաժողովը նախատեսված է մարտի 27-ին Փարիզում, որտեղ, ինչպես սպասվում է, ներկա կլինի նաև Ուկրաինայի նախագահ Վլադիմիր Զելենսկին։