Գերմանիան Ուկրաինային չի փոխանցի այնպիսի զինատեսակ, որով կարելի է հարվածել ՌԴ-ին․Շոլց

Գերմանիայի կանցլեր Օլաֆ Շոլցը երեկ Մագդեբուրգում ասել է, որ իր երկիրը չի փոխանցի Ուկրաինային որևէ զինատեսակ, որով հնարավոր կլինի հարվածներ հասցնել Ռուսաստանի տարածքին:

Նրա խոսքով, «նպատակը միայն Ուկրաինայի տարածքային ամբողջականության և ինքնիշխանության պաշտպանությունն է»:

«ԱՄՆ-ի նախագահ Ջո Բայդենն այդ կապակցությամբ բավական հստակ է ասել, որ չի կարելի փոխանցել նման տեսակի զենք: Եվ ես կարծում եմ, որ դա այն սկզբունք է, որին ես հետևում եմ և մնացածներն էլ են հետևում, և հենց դրա համար էլ մենք ուշադիր հետևում ենք մյուս երկրների գործողություններին»,- ասել է Շոլցը:

Նրա խոսքով՝ Գերմանիայի նպատակն է սատարել Ուկրաինային, բայց այնպես անել, որ ուրիշ կողմեր չներքաշվեն այդ պատերազմի մեջ:

«Վստահ եղեք, մենք ունենք խոհեմություն, հավասարակշռություն և վճռականություն, որ կանխենք այս պատերազմի ընդարձակման վտանգը»,- հավաստիացրել է կանցլերը:

Գերմանիան առաջիկայում մտադիր է կես միլիարդ եվրոյի ռազմական օգնություն տալ Ուկրաինային:

Մասնավորապես, ենթադրվում է, որ գերմանացիները Կիևին կփոխանցեն IRIS-T տեսակի ՀՕՊ համակարգի 3 միավոր, 20 հրթիռային կայանք, Gepard տեսակի 15 ՀՕՊ ինքնագնացներ, Mars տեսակի երեք զենիթահրթիռային կայանք, հազարավոր հրթիռներ և տասնյակ հազարավոր փամփուշտներ:

Բացի այդ, կառավարությունը հավանություն է տվել Ուկրաինային 100 միավոր Panzerhaubitze 2000 տեսակի հաուբիցներ տրամադրելու ծրագրին:

Աղբյուրը՝ Azatutyun.am