Շվեդիան հավելյալ կես մլրդ կրոնի ռազմական օգնություն կտրամադրի Ուկրաինային

Շվեդիան խոստացել է հավելյալ կես միլիարդ կրոնի (մոտ 47 միլիոն դոլար) ռազմական օգնություն տրամադրել Ուկրաինային՝ Ռուսաստանի հարձակմանը դիմակայելու համար։ Որոշման մասին հայտնել է երկրի վարչապետ Մագդալենա Անդերսոնը Ուկրաինայի արտգործնախարար Դմիտրի Կուլեբայի հետ հանդիպումից հետո։

«Սահմանները չպետք է փոխվեն ուժի գործադրմամբ», – BBC-ի ռուսական ծառայության փոխանցմամբ՝ ընդգծել է Շվեդիայի վարչապետը։

«Դուք պաշտպանում եք մեր եվրոպական արժեքներն ու միջազգային իրավունքի վրա հիմնված աշխարհակարգը։ Ձեզ աջակցելը մեզ համար պատիվ է և պարտականություն։ Եվ հենց դրա համար էլ իմ կառավարությունը Ուկրաինային օգնության նոր փաթեթ կտրամադրի՝ 1 մլրդ կրոն ծավալով», – ասել է Անդերսոնը։

Շվեդիայի վարչապետի խոսքով՝ Ուկրաինան սկզբում կստանա 500 մլն կրոն ռազմական աջակցություն։ Անդերսոնը չի հստակեցրել, թե կոնկրետ ինչ է ներառելու ռազմական փաթեթը, միայն նշել է, որ դա նման կլինի նախորդին։

Նախորդ օգնությունը ներառում էր հակատանկային զենքեր, անհատական պաշտպանության միջոցներ և ականազերծման սարքավորումներ:

Աղբյուրը՝ Azatutyun.am