Ես «Սուրմալուում» քարոզարշավ իրականացնելու մտադրություն չեմ ունեցել. Ավինյան

ՀՀ նախկին փոխվարչապետ, «Քաղաքացիական պայմանագիր» կուսակցության վարչության անդամ Տիգրան Ավինյանն այսօր ԱԺ-ում մասնակցում էր  հրավառություններն արգելող օրենքի նախագծի քննարկմանը:

Լրագրողների հետ զրույցում Ավինյանն անդրադառնալով օրենքին նշում է՝ սահմանափակումները  կբերեն որոշ տնտեսվարողների համար խնդիրների.«Այստեղ հարցը մշակութային է՝ մենք պետք է որոշենք, թե մեզ համար ընդունելի՞ է, որ կնունքներին, հարսանիքներին, ծնունդներին մարդիկ կազմակերպեն հրավառություն՝ ի հաշիվ մնացած բնակչության, որն ապրում է այդ շրջակայքում։ Պետք է հասկանանք՝ մենք ուզո՞ւմ ենք, որ այդ տեսակ բիզնեսը լինի։ Այս բիզնեսը չի վերանալու, այն շարունակելու է աշխատել, որոշակի լիցենզավորման է ենթարկվելու և կոնկրետ տեսակի միջոցառումներին է թույլատրվելու»։ 

Ավինյանի խոսքով՝ շատ կարևոր դետալներ կան, որոնք պետք է քննարկել տնտեսվարողների հետ՝ մասնավորապես, կապված հրավառության տեսակների հետ։ Ըստ նրա՝ կան տեսակներ, որոնք անձայն և անվտանգ են։

Անդրադառնալով այն խոսակցություններին, թե «Սուրմալու» առևտրի կենտրոնում դեպքից մի քանի օր անց նա քարոզարշավ էր իրականացնում, Ավինյանը նշում է՝ դա քարոզարշավ անելու տեղ չէր և նա նման մտադրություն չի էլ ունեցել: 

«Բայց այն վերնագրերը, որոնք ցանկալի էին որոշ լրատվականների համար, նրանք կարողացան ստանալ: Շատ դեպքերում, մենք բովանդակությունը թողած, քլիքվող վենրագրերի հետեւից ենք ընկնում և այդտեղ շատ բան է կորում»,-ասաց նա: