Կունենանք 8 պետական բուհ, դրանք կտեղափոխվեն ակադեմիական քաղաք, որը կգտնվի Աշտարակ քաղաքում. Փաշինյան

ՀՀ վարչապետ Նիկոլ Փաշինյանը այսօր Կառավարության նիստին խոսելով կրթության ոլորտի մասին, ընդգծեց՝ Հայաստանի բազմաթիվ գյուղեր դատարկվել են նաև այն պատճառով, որ նախադպրոցական տարիքից սկսած երեխաների պատշաճ կրթություն ստանալու ոչ մի հնարավորություն և հեռանկար չի եղել այդ գյուղերում:

Վարչապետի կարծիքով՝ այժմ գյուղական բնակավայրերում բացվող մանկապարտեզները, դպրոցները Հայաստանի մի շարք գյուղերի վերածննդի անկյունաքարն են դառնալու:

Ըստ Փաշինյանի՝ գյուղական և քաղաքային բնակավայրերում բացվող և բացվելիք մանկապարտեզային, նախակրթարանի դպրոցական տեղերը ոչ միայն պատշաճ կրթություն ստանալու հնարավորություն են տալու մանուկներին, նրանց բարեկեցիկ կյանքի հիմքը դնելով, այլև նրանց մայրիկների համար կրթություն ստանալու, հանրային և տնտեսական գործունեություն մեջ ներգրավելու ճանապարհ են բացելու:

Խոսելով բարձրագույն կրթության մասին, Կառավարության ղեկավարը նշեց՝ բարձրագույն կրթության բնագավառում ևս բարեփոխումների մեկնարկը չի կարելի հետաձգել:

«Ընդունելության քննությունների խայտառակ վիճակագրությունը պետք է ուժեղ ազդակ դառնա դրա համար: Այս տարի բուհական ընդունելության տեղերի շուրջ 60 տոկոսը  թափուր է մնացել: Ընդ որում, պետական բուհերում թափուր է մնացել շուրջ 40 տոկոսը, մասնավոր բուհերում՝ շուրջ 98 տոկոսը: Չնայած կան պետական բուհեր, որոնցում վիճակագրությունը մոտ է մասնավորին: Երկրում կամ չկան բուհական ստանդարտներ, կամ չեն գործում: Բարձրագույն կրթությամբ դիպլոմով մարդիկ հաճախ անմրցունակ են աշխատաշուկայում: Այս ոլորտում մենք մտադիր ենք գնալ բուհերի խոշորացման և որոշ գիտահետազոտական ինստիտուտների հետ ինտեգրման ճանապարհով, այնպես որ ունենանք 8 պետական բուհ»,- ասաց նա:

Փաշինյանը հավելեց, որ արդեն կառավարությունը կողմնորոշվել է ակադեմիական քաղաքի տեղադիրքի հարցում. այն կկառուցվի Արագածոտնի մարզում` Աշտարակ քաղաքում:

«Միավորվող և նորացվող բուհերը ժամանակի ընթացքում կտեղափոխվեն ակադեմիական քաղաք»,– ասաց Փաշինյանը: