ԱՄՆ-ը ղարաբաղյան հակամարտության գոտում հումանիտար ականազերծման համար 2 մլն դոլար է հատկացրել

Ամերիկայի Միացյալ Նահանգները հայտարարել է   2020 թվականի աշնանը Հարավային Կովկասում հայկական և ադրբեջանական ուժերի միջև ինտենսիվ մարտերից տուժած տարածքներում հումանիտար ականազերծման գործողությունների համար 2 մլն դոլար տրամադրելու մասին։ Այս մասին ասվում է ԱՄՆ-ի Պետդեպարտամենտի տարածած հայտարարության մեջ:

Նշվում է, որ ֆինանսավորումը տրվում է  տարածաշրջանային խաղաղությունն ու համագործակցությունը խթանելու համար:

«Հակամարտության գոտում ականները և չպայթած զինամթերքը շարունակում են սպանել և խեղել խաղաղ բնակիչներին, արգելափակել տնտեսական զարգացումը և խոչընդոտել տեղահանված բնակիչների անվտանգ վերադարձին

Հիմք ընդունելով 2021 թ. նոյեմբերին տրամադրված 500 հազար դոլարը՝ ԱՄՆ-ի նոր ֆինանսավորումը կշարունակի ամրապնդել ականազերծող կազմակերպությունների տեխնիկական կարողությունները ՝ մահաբեր ականների և չպայթած զինամթերքի վնասազերծման համար: Այս ջանքերը շատ կարևոր դեր են խաղում մարդկանց անվտանգության ամրապնդման հարցում և թույլ են տալիս տեղահանվածներին իրենց տները վերադառնալ ու անվտանգ կերպով վերականգնել իրենց կյանքը»,-ասվում է հայտարարության մեջ:

Նշվում է նաև, որ Միացյալ Նահանգները սովորական զենքերի ոչնչացման աշխարհի ամենամեծ ֆինանսական աջակիցն է, որը 1993 թվականից ի վեր ներդրել է ավելի քան 4,7 միլիարդ դոլար շուրջ  100 երկրներում՝ խթանելու միջազգային խաղաղությունն ու անվտանգությունը՝ քաղաքացիական բնակչության համար ականների ու չպայթած զինամթերքի ներկայացրած վտանգի չեզոքացման միջոցով միջազգային խաղաղության ու անվտանգության ամրապնդման համար: