ՀԱՊԿ-ն առաքելություն կուղարկի Հայաստան, որը կգլխավորի կազմակերպության գլխավոր քարտուղար  Ստանիսլավ Զասը

Ռուսաստանի Դաշնության նախագահ Վլադիմիր Պուտինը ՀԱՊԿ Հավաքական անվտանգության խորհրդի արտահերթ նիստի ընթացքում, որը հրավիրվել է ըստ Հայաստանի Հանրապետության վրա Ադրբեջանի ռազմական հարձակման մասին դիմումի, տեղեկացրել է գործընկերներին Հայաստանի և Ադրբեջանի սահմանին առկա  իրավիճակի մասին։

«Ռուսաստանի Դաշնության նախագահ Վլադիմիր Պուտինը տեղեկացրել է Հավաքական անվտանգության խորհրդի անդամներին ռուսական կողմի լրացուցիչ գործնական քայլերի մասին, որոնք ուղղված են լարվածության թուլացմանը», – հայտնել է ՀԱՊԿ քարտուղարությունը։

Նիստի արդյունքներով որոշվել է, որ ՀԱՊԿ-ն առաքելություն կուղարկի Հայաստան, որը կգլխավորի կազմակերպության գլխավոր քարտուղար  Ստանիսլավ Զասը:

Նշվում է, որ առաքելության հիմնական խնդիրը լինելու է Ադրբեջանի հետ հակամարտության գոտում իրադրության գնահատումը, պետությունների ղեկավարների համար զեկույցի նախապատրաստումը և դեէսկալացիայի շուրջ առաջարկների մշակումը։

Առաքելության կազմում ընդգրկված են լինելու ՀԱՊԿ Միացյալ շտաբի ղեկավար, գեներալ-գնդապետ Անատոլի Սիդորովը և կազմակերպության անդամ երկրների ներկայացուցիչներ։

ՀԱՊԿ հավաքական անվտանգության խորհրդի նիստում որոշում է կայացվել ստեղծել աշխատանքային խումբ, որը մշտապես մոնիթորինգի կենթարկի իրադրությունն իր պատասխանատվության գոտում