Միլիարդատեր Յուրի Միլները հրաժարվում է ՌԴ քաղաքացիությունից

Միլիարդատեր Յուրի Միլները թվիթերում գրել է, որ ինքը և իր ընտանիքը հրաժարվել են Ռուսաստանի քաղաքացիությունից 2022 թվականի ամռանը։ Գործարարի ներկայացուցիչը հաստատել է այս տեղեկությունը Forbes ամսագրին։

«Ես և իմ ընտանիքը մշտապես լքել ենք Ռուսաստանը 2014 թվականին՝ Ռուսաստանի կողմից Ղրիմի բռնակցումից հետո։ Եվ այս ամառ մենք պաշտոնապես ավարտեցինք Ռուսաստանի քաղաքացիությունից հրաժարվելու գործընթացը»,- ասաց գործարարը։

Յուրի Միլները Իսրայելի քաղաքացիություն է ստացել 1999 թվականին եւ մի քանի տարի ապրել այդ երկրում, որից հետո տեղափոխվել է ԱՄՆ։

Forbes-ը Միլների կարողությունը գնահատել է 7,3 միլիարդ դոլար 2022 թվականին։ Գործարարը զբաղեցրել է 15-րդ տեղը ամենահարուստ ռուսների ցուցակում, որը կազմել է ամսագիրը։

Այս տարվա սկզբին Յուրի Միլները մի քանի այլ ռուսների հետ, ինչպիսին Պավել Դուրովն է, Forbes-ին խնդրել էր իրենց ռուս գործարար չհամարել։

Սեպտեմբերին «Տրոյկա Դիալոգ» ներդրումային ընկերության նախկին սեփականատեր, ազգությամբ հայ Ռուբեն Վարդանյանը հրաժարվել է Ռուսաստանի քաղաքացիությունից։ Նա հայտարարեց, որ տեղափոխվել է Լեռնային Ղարաբաղի Հանրապետություն։

Հունիսին մեկ այլ միլիարդատեր՝ Freedom Finance ներդրումային ընկերության հիմնադիր Թիմուր Տուրլովը, ով ավելի քան 10 տարի ապրել է Ղազախստանում, հրաժարվել է Ռուսաստանի քաղաքացիությունից և այս տարի ստացել է այս երկրի քաղաքացիություն։

Թարգմանեց՝ Աստղ Խաչատրյանը