Երևանն ու Թբիլիսին կասկածի տակ դրեցին ռուսական հետաքննությունը․Սաֆարյան

Քաղաքագետ Ստյոպա Սաֆարյանն ադրադարձել է պաշտոնական Երևանի և Թբիլիսիի տարածած հաղորդագրություններին, ըստ որի ժխտվում է Ղրիմի կամրջի համար պայթուցիկով քողարկված բեռի Հայաստանի ու Վրաստանի տարածքով անցած լինելը:

Նա գրել է.

«Պաշտոնական Երևանն ու Թբիլիսին կասկածի տակ դրեցին ռուսական ՖՍԲ-ի հետաքննությունը Ղրիմի կամրջի համար պայթուցիկով քողարկված բեռի’ իբրեւ թե Հայաստանի ու Վրաստանի տարածքով անցած լինելու մասին։

Վրաստանը հայտարարել է, որ իր տարածքով պայթուցիկով փաթեթավորված բեռ չի անցել, իսկ հայկական ընկերությունը փաստարկված հերքել է ՖՍԲ-ի պնդումը, թե Երեւանում բեռը ԵԱՏՄ կանոններով ներկրվելուց հետո վերաձեակերպվել է ու արտահանվել Ռուսաստան։

Հայաստանը փաստացի ներկայացրել է, որ Բուլղարիայից Հայաստան մուտք գործված բեռի համար “երկակի նշանակությունն” է հանվել, քանի որ բեռն այդպիսին չի եղել ու վստահ հայտարարել է, որ առկա են այդ ամենն ապացուցող տեսա, լուսանկարային ապացույցները։ Այդպիսով, ստացվում է, որ եթե անգամ շինարարական բեռի մեջ պայթուցիկ է տեղադրվել, ապա դա արվել է Ռուսաստանի տարածքում, բայց ոչ Վրաստանի կամ Հայաստանի։

Հայաստանի իրավապահ մարմինները պետք է շարունակեն այս հարցով ճշմարտությունը հասցնել ոչ միայն աշխարհին, այլ ռուս իրավապահներին ուղարկել այդ ամբողջը’ պահանջելով հերքել զրպարտությունը»։

Անդրադառնալով ՀՀ տարածքով տեղափոխված պոլիէթիլենային թաղանթով բեռնված բեռնատարի մասին մամուլում առկա հրապարակումներին՝ ՀՀ ՊԵԿ-ը պարզաբանում է տարածել, ըստ որի՝ պոլիէթիլենային թաղանթով բեռնված բեռնատարի Հայաստանի Հանրապետության մուտքի, մաքսային հսկողության, ռենտգեն զննման, մաքսազերծման, փաստաթղթային ձևակերպման, արտահանման գործընթացները տեղի են ունեցել պատշաճ և օրինական կերպով: Իսկ Վրաստանի ֆինանսների փոխնախարար Գեորգի Կակաուրիձեն՝ մեկնաբանելով Ղրիմի կամրջի վրա տեղի ունեցած պայթյունը՝ նշել էր, որ պայթուցիկ սարքով բեռնված որևէ բեռնատար չի հատել Վրաստանի մաքսային սահմանը։