Ավինյանի արձագանքը՝ Խաչատրյանի մտահոգություններին

Մեկնարկել է Երեւանի ավագանու հերթական նիստը: Երեւանի քաղաքապետ Հրաչյա Սարգսյանը բացակայում է, նիստը վարում է քաղաքապետի տեղակալ Լեւոն Հովհաննիսյանը:

Նախքան օրակարգային հարցերին անդրադառնալը, «Լույս» խմբակցության անդամ Անի Խաչատրյանը խնդրանք-պահանջով հանդես եկավ: Ավագանու անդամը հայտնեց, որ ցանկանում է անվտանգության աշխատողներին հրավիրեն նիստերի դահլիճ, որոնք կստուգեն՝ զինված անձ կա՞ դահլիճում, թե՞ ո՛չ:

Հարցին միջամտեց Երեւանի փոխքաղաքապետ Տիգրան Ավինյանը, նշելով՝ խնդիրը լուծված է, ստուգված է, անհանգստանալու կարիք չկա: «Բոլորս գիտենք կոնկրետ ինչ խնդիր է, պարոն Անտոնյան ձեզ է վերաբերվում, խնդրում եմ ուղիղ արձագանքել»,-ասաց փոխքաղաքապետը:

Երեւանի ավագանու «Իմ քայլը» խմբակցության անդամ Արման Անտոնյանն էլ արձագանքեց. «Բոլորը գիտեն, որ ես զենք չեմ կրում, դրա համար էլ հարկ չեմ համարել արձագանքել նման թյուրիմացություններին»:

Հակադարձելով գործընկերոջը Ավինյանն ասաց՝ դա թյուրիմացություն չէ, հարց է բարձրաձայնվում, որին պետք է պատասխան տալ:

«Խնդրում եմ հստակ ասեք, որ զենք չունեք ձեզ մոտ, եւ ես կարծում եմ՝ այս դահլիճում բոլորը հստակ հասկանում են, որ զենքով չեն կարող ներս մտնել»,-ասաց Ավինյանը: Անտոնյանն էլ համաձայնեց: