Պապիկյանի մասին հրապարակված հոդվածն իրականությանը չի համապատասխանում

2022 թվականի հուլիսի 21-ին Երևան քաղաքի առաջին ատյանի ընդհանուր իրավասության դատարանի կողմից հրապարակվել է վճիռ, որով դատարանը Yerevan.today լրատվամիջոցին պարտավորեցրել է հերքման տեքստ տեղադրել՝ ՀՀ պաշտպանության նախարար Սուրեն Պապիկյանի մասին իրականությանը չհամապատասխանող լուր հրապարակելու համար։

Ստորև ներկայացնում ենք հերքումը․

«Մեդիա Պլյուս» ՍՊ ընկերությունը հերքում է «https://yerevan.today» կայքում 11.06.2021թ. հրապարակված «Հայաստանի նոր միլիոնատերերը. Պապիկյանը 3 տարում ԱՍՖԱԼՏԻ վրա դարձել է դոլարային միլիոնատեր» հոդվածում Սուրեն Պապիկյանի վերաբերյալ ներկայացված զրպարտություն համարվող հետևյալ փաստացի տվյալները՝ «Պապիկյանը 3 տարում ԱՍՖԱԼՏԻ վրա դարձել է դոլարային միլիոնատեր: Ստացվում է, որ այս իշխանությունը, ճանապարհներ է ասֆալտ արել ոչ թե նրա համար, որ բնակչությունը լավ ճանապարհներով երթևեկի, այլ որ Սուրեն Պապիկյանը և այլոք փող աշխատեն: Փաստացի ստացվում է, որ Պապիկյան Սուրենն արդեն 2020 թվականին դարձել է դոլարային միլիոնատեր». դրանք չեն համապատասխանում իրականությանը»։