«Մեծ Յոթնյակը» Ռուսաստանին կոչ է արել Ուկրաինային վերադարձնել Զապորոժյեի ատոմակայանը

«Մեծ Յոթնյակի» երկրները (Մեծ Բրիտանիա, Գերմանիա, Իտալիա, Կանադա, Ֆրանսիա, Ճապոնիա և ԱՄՆ) Ռուսաստանին կոչ են արել Ուկրաինային վերադարձնել Զապորոժյեի ատոմակայանի նկատմամբ ամբողջական վերահսկողությունը, ինչպես նաեւ ձեռնարկության տարածքից դուրս բերել ռուսական զորքերը։ Համապատասխան հայտարարությունը հրապարակվել է կազմակերպության կայքում, գրում է RTVI-ը:

«Մենք կոչ ենք անում Ռուսաստանին անհապաղ վերադարձնել Զապորոժյեի ԱԷԿ-ի ամբողջական վերահսկողությունը իր օրինական ինքնիշխան սեփականատիրոջը՝ Ուկրաինային, դուրս բերել ռուսական ողջ անձնակազմը օբյեկտից և դադարեցնել ԶԱԷԿ-ը անխոհեմ և վտանգավոր կերպով Ռուսաստանի վերահսկողության տակ դնելու ցանկացած փորձ, ինչը կարող է հետագայում վտանգել նրա անվտանգ և հուսալի գործունեությունը»,- ասված է հայտարարության մեջ։

Կազմակերպությունը նաև դատապարտել է «Ռուսաստանի կողմից ուկրաինական ատոմակայանի ղեկավարության և անձնակազմի պարբերական առևանգումները, ուկրաինական անձնակազմի վրա ճնշումների այլ ձևերի կիրառումը»։

«Այս գործողություններն էլ ավելի են վատթարացնում ԶԱԷԿ-ի միջուկային անվտանգությունը՝ թույլ չտալով հիմնական անձնակազմին կատարել իրենց անփոխարինելի գործառույթները։ Մենք կտրականապես մերժում ենք այս անխոհեմ, դաժան և վտանգավոր գործողությունները և պահանջում անհապաղ ազատ արձակել ձերբակալվածներին»,- ասվում է հայտարարության մեջ։

Կազմակերպությունը նաև հայտարարել է, որ երբեք չի ճանաչի «Ուկրաինայի Դոնեցկի, Լուգանսկի, Զապորոժիեի և Խերսոնի շրջաններն անօրինական կերպով ՌԴ-ին միակցելու փորձերը և խստորեն դատապարտելու է Ռուսաստանի վերահսկողությունը միջուկային օբյեկտների նկատմամբ Ուկրաինայի միջազգայնորեն ճանաչված սահմաններում»։

«Բռնակցման ցանկացած նման փորձ առ ոչինչ է: Մենք վերահաստատում ենք Ուկրաինայի ամբողջական ինքնիշխանությունը նրա ողջ տարածքում, ներառյալ այս միջուկային օբյեկտը։ ԶԱԷԿ-ը և նրա արտադրած էլեկտրաէներգիան պատկանում են Ուկրաինային, և մենք շեշտում ենք, որ Ռուսաստանի փորձերը՝ անջատել կայանը ուկրաինական էներգահամակարգից, անընդունելի կլինեն։ Մենք խստորեն շեշտում ենք, որ ԶԱԷԿ-ը չպետք է օգտագործվի ռազմական գործողությունների կամ նյութական միջոցների պահպանման համար»,- նշվում է հայտարարությունում:

Թիվ 1