Կառավարությունը ներդնում է նոր ծրագիր՝ «Պաշտպան հայրենյաց»

Կառավարությունը ներդնում է նոր՝ «Պաշտպան հայրենյաց» ծրագիր։ Ինչպես տեղեկացրեց ՀՀ պաշտպանության նախարար Սուրեն Պապիկյանը, օրենսդրական փոփոխությունների արդյունքում ներդրվում է շարքային և սպայական կազմից պարտադիր զինվորական ծառայությունից պայմանագրային ծառայության անցնելու նոր համակարգ. 

«Ծրագիրը նախատեսում է շարքային և սպայական կազմերի պարտադիր զինծառայության առաջին վեց ամիսը լրանալուց հետո կառավարության սահմանված կարգով պայմանագրային զինվորական ծառայություն անցնելու հնարավորություն՝ ծառայության ժամկետը սահմանելով 5 տարի, ինչպես նաև պայմանագրի ժամկետը լրանալու կամ առողջական վիճակի պատճառով ոչ պիտանի ճանաչվելու հիմքով ծառայությունից ժամկետից շուտ արձակվելիս նրանց համար սահմանելով պատվովճար սահմանելու իրավունք։ Ի դեպ, պատվովճարի չափը նախատեսում է սահմանել 5 մլն դրամ, որ տնօրինվում է ազատորեն»։

Սուրեն Պապիկյանը նշեց, որ պայմանագիր կնքած զինծառայողները ևս ենթակա են լինելու ատեստավորման։

Պապիկյանը նշեց, որ պայմանագրային զինծառայությունից հրաժարվելու դեպքում այդ ժամկետը չի հաշվարկվելու զինծառայողի պարտադիր ծառայության ժամկետում, և զինծառայողը պարտավոր է լինելու շարունակել զինծառայության չծառայած մասը։

Այս նախագիծը ճանաչվեց անհետաձգելի, և կներկայացվի ԱԺ։

ՀՀ վարչապետ Նիկոլ Փաշինյանն էլ հավելեց, որ սա պրոֆեսիոնալ բանակի անցնելու քայլերից մեկն է. «Այս փուլում այն ժամկետայինները, որ կուզենան անցում կատարել պրոֆեսիոնալ ծառայության, առնվազն հինգ տարվա հնարավորությունն այս օրենքով կապահովվի»։