Շենքային պայմանների բարելավումը միտված է քաղաքացիներին մատուցվող ծառայությունների որակի բարձրացմանը

Արգիշտի 1 հասցեում գտնվող Երևանի քաղաքապետարանի գլխավոր մասնաշենքը շահագործման է հանձնվել 2004 թվականին: Քաղաքացիներին մատուցվող ծառայությունների ընդլայնման հետ տարիների ընթացքում մեծացել է նաև աշխատակազմը: Քաղաքապետարանը Երևանի բնակիչներին ընդունում է երկու մասնաշենքում:

«2004 թվականից շենքը չի հիմնանորոգվել: Այս տարի քաղաքապետի նախաձեռնությամբ մեկնարկեցին նորոգման աշխատանքներ: Նորոգվում է քաղաքապետարանի գլխավոր մասնաշենքի փոքր դահլիճը, որը կծառայի բնակիչների ընդունելությանը, նաև աճուրդների կազմակերպմանը՝ այդ կերպ հարմարավետ պայմաններ ստեղծելով քաղաքացիների սպասարկման համար»,-նշում է «Գերատեսչական շենքերի պահպանման և շահագործման» ՓԲԸ տնօրեն Գեղամ Խաչատրյանը:

Քաղաքապետարանի մասնաշենքերի տանիքներին նորոգումից հետո կտեղադրվեն արևային ֆոտովոլտային կայաններ, որոնք կնվազեցնեն էներգածախսը շուրջ 30 տոկոսով: Տնտեսված միջոցները համայնքը կուղղի բնակիչների խնդիրների լուծմանը:

Մինչև հիմա քաղաքապետարանի ամբողջ արխիվը պահպանվում էր մեկ սենյակում: Փաստաթղթերի մի մասն էլ վարչություններն իրենց սենյակներում էին տեղավորում: Առաջիկայում արխիվային գործի վարումն ամբողջությամբ կկազմակերպվի նոր պայմաններում:

«Կառուցվածքային փոփոխություններից հետո, երբ ստեղծվեց արխիվային առանձնացված ստորաբաժանում, սկսեցինք արխիվային գործի կենտրոնացման գործընթաց: Առաջիկայում կունենանք աշխատանքային առավել հարմարավետ պայմաններ: Հաջորդ փուլով արխիվի թվայնացումն է»,- նշում է քաղաքապետարանի աշխատակազմի քարտուղարության պետի ժ/պ Էդգար Աբրահամյանը:

«Նոր տարածքը զբաղեցնում է մոտ 300 քմ: Այն հիմնանորոգվեց, կահավորվեց և այժմ համապատասխանում է սահմանված չափորոշիչներին»,-ասում է Գեղամ Խաչատրյանը:

Դեռևս մարտին ավագանին հաստատեց իրավական ոլորտում գործունեություն իրականացնող ստորաբաժանումների բարեփոխումը: Կառուցվածքային փոփոխության շնորհիվ ընդլայնվեց քաղաքապետարանի իրավաբանական վարչությունը: Անմիջապես քաղաքացիների հետ աշխատող համայնքային ծառայողների համար փոխվեցին ու բարելավվեցին պայմանները:

Նորոգման և տարածքների հարմարեցման գործընթացը շարունակվում է: Արդյո՞ք շենքային պայմանները նպաստում են աշխատանքին, ի՞նչն է անհարմարություն պատճառում՝ քաղաքապետն աշխատակիցներից պարբերաբար անձամբ է հետաքրքրվում:

Շենքային պայմանների բարելավումն ունի մեկ նպատակ՝ քաղաքացիներին մատուցվող ծառայությունների որակը բարձրացնել նոր մակարդակի։