Հայկական բանակը ռուսական զենքի զգալի գնումների կարիք ունի․ Աբրահամյան

Հայկական բանակը ռուսական զենքի զգալի գնումների կարիք ունի։ Այս մասին հոկտեմբերի 27-ին Ազգային ժողովում ճեպազրույցի ժամանակ ասաց ընդդիմադիր պատգամավոր, Հայաստանի Հանրապետական ​​կուսակցության անդամ Տիգրան Աբրահամյանը։

Պատգամավորը միաժամանակ բարձր գնահատեց Հնդկաստանի քաղաքական աջակցությունը եւ հանդես եկավ այս երկրից զենք ձեռք բերելու օգտին։

«Այնուամենայնիվ, դա ոչ մի կերպ չպետք է խոչընդոտի Ռուսաստանից մատակարարումներին, առավել եւս՝ որեւէ կերպ ընդհատի դրանք։ Անկախ տարբեր խմբերի մարդկանց ցանկություններից, եթե թեման դիտարկենք Հայաստանի անվտանգության տեսանկյունից, ապա մեր ենթակառուցվածքներն ու հնարավորությունները պահանջում են զգալի գնումներ, այդ թվում՝ Ռուսաստանից»,- ասաց Աբրահամյանը։

Նրա հավաստմամբ՝ հայկական բանակի համար առաջնահերթ սպառազինության համակարգերը պետք է գնել հենց Ռուսաստանից։

«Ինչպես ցույց տվեցին վերջին չորս տարիների իրադարձությունները, Հայաստանի իշխանությունները, նույնիսկ զենքի գնման համար միջոցների առկայության դեպքում, գործել են ոչ այդքան արդյունավետ։ Մինչ այժմ ամենակարեւոր հարցը որոշված ​​չէ՝ ինչպիսի բանակ է պետք Հայաստանին։ Առայժմ ամեն ինչ մնում է բարի ցանկությունների ոլորտում»,- եզրափակեց ընդդիմադիրը։

Հիշեցնենք, որ վարչապետ Նիկոլ Փաշինյանը սեպտեմբերի 29-ին ելույթ ունենալով կառավարության նիստում, անդրադարձել էր հայ-ադրբեջանական սահմանին տիրող իրավիճակին։ Նրա խոսքով, Երեւանին, մասնավորապես, մերժում են զենքի տրամադրման հարցում։ «Կան դեպքեր, երբ հարյուր միլիոնավոր դոլարների մատակարարումները, որոնք արդեն վճարվել են, ոչ մի կերպ չեն իրականացվում, այդ թվում՝ դաշնակից երկրների կողմից։ Սա ցավալի իրողություն է»,- ասել էր կառավարության ղեկավարը։