Հաճելի չի էկոնոմիկայի նախարարի հետ էս կարգի զրույց ունենալ. Խ․ Սուքիասյանը՝ Քերոբյանին

«Շատ պաշտոնյաներ են գալիս, թվեր են ասում, ժամկետներ են ասում, կազմակերպությունների անուններ են տալիս, Ձեզ հետ խոսում եմ, ինչ ասում ենք՝ ասում եք՝ էդ արեցինք, էդ գնում ենք, պայմանավորվել ենք։ Ոչ թիվ, ոչ ժամկետ, ոչ ծավալ։ Ինձ համար հաճելի չի էկոնոմիկայի նախարարի հետ էս կարգի զրույց ունենալ»,- ասել է ԱԺ «Քաղաքացիական պայմանագիր» խմբակցության պատգամավոր Խաչատուր Սուքիասյանը 2023թ. բյուջեի քննարկումների ժամանակ դիմելով Վահան Քերոբյանին։

Նախարարը շնորհակալություն է հայտնել քննադատության համար, հավելելով, որ իր ողջ զեկույցը կառուցված է եղել թվերի հիման վրա.

«ՀՀ-ում 14.1 տոկոս տնտեսական ակտիվության ցուցանիշ, արտաքին առևտրաշրջանառության ցուցանիշն աճել է 63 տոկոսով, ԵԱՏՄ-ի հետ՝ 70-ից ավելի տոկոսով, դրանք թվեր չե՞ն։ Կարող եմ անվերջ թվեր ասել»։

Խաչատուր Սուքիասյանն էլ հակադարձել է, որ 14.1 տոկոս տնտեսական ակտիվության ցուցանիշը հայտնի դեպքերի արդյունքում է եղել.

«Մի վերցրեք ձեզ վրա։ Դա բիզնեսն է տանջվում, աշխատում, չարչարվում, ասում եք՝ այսինչ բանը եղավ։ Ես ձեզ հարցեր եմ տալիս, այլ պատասխաններ եմ ստանում»։