ԵՄ առաջնորդները Բրյուսելում արտակարգ ժողով են հրավիրել․ Թրամփին հակազդելու ծրագիր են մշակել

Եվրոպական առաջնորդները հավաքվել են Բրյուսելում՝ արտակարգ ընթրիքի՝ քննարկելու Միացյալ Նահանգների հետ արագ վատթարացող հարաբերությունները, որոնք առավել հստակ դրսևորվել են ԱՄՆ նախագահ Դոնալդ Թրամփի Գրենլանդիան բռնակցելու «մոլուցքային ցանկությամբ», հաղորդում է The New York Times (NYT)-ը՝ հղում անելով աղբյուրներին։

Հոդվածում նշվում է, որ Իտալիայի վարչապետ Ջորջիա Մելոնին կողմ է արտահայտվել ԱՄՆ առաջնորդի հետ երկխոսության շարունակությանը, Գերմանիայի կանցլեր Ֆրիդրիխ Մերցը կոչ է արել անհապաղ միջոցներ ձեռնարկել ԵՄ-ի տնտեսական կախվածությունը Վաշինգտոնից նվազեցնելու համար, իսկ Ֆրանսիայի նախագահ Էմանուել Մակրոնը հայտարարել է, որ Թրամփի հարգանքը պետք է վաստակել՝ ցուցադրելով նրան դիմակայելու պատրաստակամություն։

Թերթը հաղորդում է, որ ԱՄՆ նախագահի անցյալ շաբաթ հնչած սպառնալիքներից հետո քաղաքական գործիչները մշակել են գործողությունների ծրագիր։

«Առաջնորդների ծրագիրն է պահպանել հանգստությունը պարոն Թրամփի ապագա սադրանքների ժամանակ, սպառնալ պատասխան մաքսատուրքերով և, ըստ պաշտոնյաների, աշխատել կուլիսներում՝ Եվրոպան ռազմական և տնտեսական առումով պակաս կախված դարձնելու իր ավելի ու ավելի անվստահելի դաշնակիցից», – նշվում է հոդվածում։

Հրապարակումը հավելում է, որ ընտրված այս ռազմավարությունը ԵՄ առաջնորդներին ստիպել է ակտիվորեն դեմ լինել Թրամփին խոսքերով, բայց դեռևս դժվարանում է դրանք գործողություններով աջակցել։ Ամերիկացի քաղաքական գործչին հանգստացնելու համար եվրոպացիները քննարկում են Արկտիկայի անվտանգությունն ամրապնդելու ուղիները. երկարաժամկետ հեռանկարում նրանք մտադիր են կատարելագործել իրենց զինված ուժերը, նվազեցնել կախվածությունը ամերիկյան տեխնոլոգիաներից և վերաուղղորդել առևտուրը: Այնուամենայնիվ, Եվրոպան դեռևս չունի Վաշինգտոնից «ռազմական ինքնավարության» արագ հասնելու ծրագիր:

Նախկինում հաղորդվել էր, որ ԵՄ-ն մտահոգված է ամերիկյան հեղուկ բնական գազից իր կախվածությամբ: Արդյունքում, Եվրոպան քննարկում է Կանադայից, Կատարից և Հյուսիսային Աֆրիկայի երկրներից էներգակիրների մատակարարումների ավելացման հարցը: