Երևանի քաղաքապետ Հրաչյա Սարգսյանը հարցազրույց է տվել Civilnet լրատվականին։ Անդրադարձ է կատարվել մի շարք խնդրահարույց թեմաների՝ Երևանի զարգացման հեռանկարին, հանրային տրանսպորտի խնդրին, աղմուկի, փոշու ու չվերահսկվող շինարարությանը և այլ հարցերի։
Անդրադառնալով հանրային տրանսպորտի խնդիրներին՝ քաղաքապետ Հրաչյա Սարգսյանը նշել է․
Քանակային համալրումը որպես այդպիսին մենք 2023 թվականին 70 տոկոսով կունենանք։ Բայց միայն տրանսպորտի ձեռքբերումով չէ, որ երթուղային ցանցը լուծվելու է, մենք փողոցներում ճիշտ երթևեկության կազմակերպում պետք է ունենանք, ինչպես տարբեր երկրներում է, քաղքացիները իմանան, թե, որ պահին է ավտոբուսը մոտենալու իրենց։ Հիմնական նպատակը այն է, որ քաղաքացին կարողանա կանխատեսի, արագ A կետից B կետը տեղափոխվի․ բարդ համակարգ է, բայց դրա լուծումը ես ամբողջությամբ տեսնում եմ։ Մենք այս պահի դրությամբ անցած տարի 211 ավտոբուս էինք ձեռք բերել, այս տարի 165, կարծում եմ դեկտեմբերին այդ խմբաքանակը կհասնի։ 30 տրոլեյբուսի մրցույթ էինք հայտարարել, որոնցից 15-ը Երևանում կլինի դեկտեմբերին, հաջորդ՝ 15-ը կարծում եմ կլինի հունվար-փետրվար ամիսներին։
-Մենք Աջափնյակում իսկապե՞ս կունենանք մետրոյի կայարան, թե՞ առաջիկայում ընտրություններ են դրա համար ենք խոսում մետրոյի մասին։
– Նախագծման աշխատանքների մրցույթը դեռ 2020 թվականին էր հայտարարվել, երբ դեռ նախընտրական փուլի մասին խոսակցություններ անգամ չկային, ունենալ՝ ես վստահ եմ, որ հնարավորություն կա ունենալու Աջափնյակում մետրոյի կայարան։ Այս պահի դրությամբ փաստ է, որ ունենք նախագծող կազմակերպություն և նախագծման աշխատանքներ, մենք ուսումնասիրում ենք, հանձնում-ընդունում ենք իրականացնում և ակնկալում ենք, որ հաջորդ տարի կունենանք ամբողջական նախագիծը, որից հետո արդեն պետք է բանակցել, թե ի՞նչ ֆինանսական միջոցներով է մետրոպոլիտենի նոր կայարանը կառուցվելու, քանի որ գիտեք՝ լինի համայնքային, թե պետական բյուջե, պետք է բյուջետային հատկացում լինի, այս պահի դրությամբ բյուջետային հատկացում չկա, բայց, երբ լինի նախագիծը և մենք ունենանք տվյալ, թե որքան կարժենա կայարանի կառուցումը՝ մենք հնարավորություն կունենանք հասկանալ՝ ինչ ֆինանասական միջոցներից ենք աշխատանքները սկսելու։
ամբողջական հարցազրույցը՝ այստեղ:
