«Այսօր կարծում եմ անհրաժեշտ է արձանագրել, որ մեր երկրում այդ հայեցակարգի ուղղությամբ բավարար չափով տեսանելի ու շոշափելի աշխատանք չի իրականացվել»,-խորհրդարանում պաշտպանության և անվտնագության հարցերով մշտական հանջնաժողովի նախագահի պաշտոնում ՔՊ-ական Վիլեն Գաբրիելյանի թեկնածության քննարկման ժամանակ ասաց «Ուժեղ Հայաստան» խմբակցության պատգամավոր Վաղինակ Վարդանովը՝ անդրադառնալով 2 տարի առաջ «Համապարփակ պաշտպանության և անվտանգության հայեցակարգին», որը հանրային ընկալման մեջ ավելի հայտնի է «Ազգ-բանակ» գաղափարով։
նա նշեց, որ շատ առաջատար երկրներ նախկինում ունեցել են այնպիսի աշխարհաքաղաքական խնդիրներ որոնք ներկայում Հայաստանն ունի և այդ հայեցակրգը ներդնելով լուծել են դրանք։
Վարդանովը հիշեցրեց, որ ՔՊ-ական պատգամավոր Վիլեն Գաբրիելյանն էլ իր խոսքում նշեց, որ այդ հայեցակարգը ընդունվել է, նախարարի հրամանները կան գործողությունների համար։
«Բայց պաշտպանության ոլորտում փաստաթուղթը ինքնանպատակ չէ, այն ունի նպատակ միայն այն դեպքում, երբ վերածվում է գործողության, ինստիտուցիոնալ փոփոխության և պաշտպանունակության բարձրացման։
Հայտարարելով, որ արդեն տեսել ենք, թե ինչպիսի հետևանքներ են լինում, երբ այդ որոշումները մնում են թղթի վրա՝ Վարդանովն ասաց. «Հայաստանը վերջին տարիներին ծանր կորուստներ է կրել և այդ փորձը մեզ պարտադրում է այլևս չսահմանափակվել օրենքների, որոշումների և հրամանների ձևական ընդունմամբ, մեզ անհրաժեշտ են տեսանելի չափելի և գործնական արդյունքներ»։
Ընդդիմադիր պատգամավորը նշեց, որ Հայաստանը Խորհրդարանական երկիր է և պետք է իրականացնի ոլորտի վերահսկում և կարգավորում։
«Մենք այլևս սխալվելու հնարավորություն չունենք, այն կարող է մեզ համար ճակատագրական լինել»,- ասաց Վարդանովը՝ առանձնացնելով ՀՀ -ի ռազմավարական խորության գործոնը և աշխարհաքաղաքական վիճակը:
