«Հանուն Հանրապետության» կուսակցությունը հայտարարություն է տարածել, որը ներկայացնում ենք ստորև․
Նոյեմբերի 15-ին Ֆրանսիայի Սենատը 296 «կողմ» և մեկ «դեմ» ձայների հարաբերակցությամբ ընդունված հայանպաստ բանաձևով Ֆրանսիան կատարեց կարևորագույն դիվանագիտական և քաղաքական քայլ, որն ունակ է ճեղքել այն արատավոր շրջանը, որում հայտնվել են Հայաստանն ու Արցախը՝ ենթարկվելով հաղթողի «իրավունքը» բանեցնող Ադրբեջանի և իր դաշնակիցների մեծածավալ ճնշումներին:
Խիստ էական է, որ Ֆրանսիայի հարաճուն աջակցությունը Հայաստանին ձեռք է բերում ինստիտուցիոնալ բնույթ և ձևակերպվում է որպես պետական քաղաքականության դրույթ՝ ամրագրված օրենսդիր մարմնի վերին պալատի քաղաքական փաստաթղթում:
Սա վկայում է Հայաստանի և Ֆրանսիայի միջև առկա առանձնաշնորհյալ հարաբերությունների հետագա խորացման մեծ ներուժի մասին, որի կենսագործումը կարող է լրջորեն փոխել ուժերի հարաբերակցությունն Անդրկովկասում և խթանել Հայաստանի անվտանգության նոր ճարտարապետության ձևավորումը:
Ուշագրավ է, որ Սենատում բանաձևի քննարկմանը պատվո հյուրի կարգավիճակում ներկա են եղել Ֆրանսիայում Հայաստանի դեսպանն ու Լեռնային Ղարաբաղի ներկայացուցիչը:
Սա ազդու խորհրդանշական քայլ է, որը բանաձևում Արցախին նվիրված հիմնարար դրույթների հետ մեկտեղ ուղղված է Արցախի շուրջ անվտանգային սպառնալիքների լիցքաթափմանը և Արցախի ժողովրդի իրավունքների երաշխավորման ուղղությամբ Ֆրանսիայի հանձնառության ձևակերպմանը:
Պակաս կարևոր չէ, որ ներկայիս փոթորկուն միջազգային իրավիճակում, երբ վերատեսության է ենթարկվում գլոբալ անվտանգության համակարգը, Ֆրանսիան՝ որպես ՄԱԿ-ի անվտանգության խորհրդի մշտական անդամ, ցույց է տալիս իր հավատարմությունը համապարտադիր կանոնների վրա հիմնված աշխարհակարգին, որտեղ հավասարապես ապահովված են ինչպես մեծ ու ազդեցիկ, այնպես էլ փոքր և սահմանափակ ռեսուրսներով պետությունների ու ժողովուրդների անվտանգությունն ու իրավունքները: Սա ուղերձ է միջազգային իրավակարգի դեմ ոտնձգող ագրեսոր պետություններին, որ վերադարձ ուժի իրավունքին չի լինելու, և մարդկությունը դիմագրավելու է արյունարբու բռնապետների հարուցած մարտահրավերին:
Հանուն Հանրապետության կուսակցությունն իր երախտագիտությունն է հայտնում բարեկամ Ֆրանսիային և ֆրանսիացի ժողովրդին Հայաստանի ու Արցախի սատարման այս աննախադեպ քաղաքական ակտի համար, որը, լիահույս ենք, ունենալու է համարժեք զարգացում և դառնալու է Հայաստանի ինքնիշխանության և անվտանգության անկյունաքարային երաշխիքներից մեկը։
Հանուն Հանրապետության կուսակցության քաղաքական խորհուրդ
15 նոյեմբերի, 2022թ․
Երևան
