Կառավարության պարտքը դրամային արտահայտությամբ 2023 թվականի ավարտին կկազմի 4 տրիլիոն 625 միլիարդ դրամ կամ Համախառն ներքին արդյունքի 49,6 տոկոսը: Այս մասին այսօր Ազգային ժողովում ասաց Էկոնոմիկայի նախարար Տիգրան Խաչատրյանը:
«2023 թվականի ընթացքում կնվազի արտաքին պարտքի կշիռը և տարեվերջին կկազմի 58,6 տոկոս՝ այս տարեվերջի 62,1 տոկոսի փոխարեն»,- նշեց նա:
Տիգրան Խաչատրյանը նշեց, որ մեր մակրոտնտեսական քաղաքականության հուսալիության մասին հատկապես վկայում է այն, որ հենց հիմա ընթանում են բանակցություններ մի շարք միջազգային ֆինանսական կազմակերպությունների հետ:
«Մեր միջազգային գործընկերներն էլ կասեն, որ Հայաստանի կառավարությունը վարկավորվելու կամ նոր վարկային միջոցներ ներգրավելու որևէ իմիջային դժվարություն չունի, և դա իր մակրոտնտեսական հուսալի քաղաքականության արդյունքն ու հետևանքն է: Երբ կարիք առաջանա, մեր միջազգային ֆինանսական գործընկերները պատրաստ են արձագանքել և տվյալ պահի համար ամենաբարենպաստ պայմաններով վարկավորում առաջարկել»,- ասաց նա:
