ՀՀԿ փոխնախագահ Արմեն Աշոտյանը հայտարարել է, որ «Զվարթնոց» օդանավակայանում արգելել են իրեն մեկնել Լիսաբոն՝ մասնակցելու ԵԺԿ Քաղաքական համաժողովին։
Այսօր հրավիրված ասուլիսի ժամանակ Աշոտյանը հայտարարեց՝ իրեն օդանավակայանում ասել են, թե ինչ-որ քրեական գործով մեղադրյալ է։ Սակայն ըստ Աշոտյանի, իրեն մեղադրանք առաջադրելու մասին չեն ծանուցել.
«Ծանուցման բացակայությունից զատ իմ հանդեպ կիրառվել է չհեռանալու մասին որոշում, որը նույնպես ես պետք է իմ ստորագրությամբ հաստատեմ։ Չեմ հաստատել, որովհետև չկա այդպիսի ծանուցում»,- ասաց Արմեն Աշոտյանը։
ՀՀԿ փոխնախագահը հայտարարեց, որ իրենք մտադիր են քրեական գործ հարուցելու համար դիմել իրավապահներին, քանի որ տեսնում են համապատասխան պետական պաշտոնյաների կողմից առնվազն պաշտոնեական դիրքի չարաշահում։
Մինչ այդ տեղեկացնենք, որ իրավապահ մարմիններն առայժմ չեն մեկնաբանել, թե ինչո՞ւ է արգելվել Աշոտյանին մեկնել երկրից, ի՞նչ քրեական գործի շրջանակներում։
