ՀՀ զինված ուժերի գլխավոր շտաբի պետի նախկին տեղակալ Ստեփան Գալստյանը, որը գտնվում էր Երևանի «Կենտրոն» քրեակատարողական հիմնարկում, տեղափոխվել է «Էրեբունի» բժշկական կենտրոն։
Այս մասին լրատվամիջոցներին հայտնել է նրա պաշտպան Անդրանիկ Մանուկյանը։
«Ստեփան Գալստյանը տացիոնար բուժում է ստանում։ Չեմ կարող ասել թե ինչ խնդիր է նրա մոտ, բժշկական գաղտնիք է։ Ներկա պահին իրեն վատ է զգում, առողջական վիճակն այդքան էլ լավ վիճակում չէ»,-նշել է պաշտպանը՝ հավելելով, որ նախկին բարձրաստիճան զինվորականի խափանման միջոցի փոփոխման հարցով պատրաստվում է դիմել դատարան՝ արտահերթ նիստ անցկացնելու համար։
Հիշեցնենք՝ Երևանի ընդհանուր իրավասության դատարանը նախորդ տարվա հոկտեմբերի 2-ին Գլխավոր շտաբի պետի տեղակալ Ստեփան Գալստյանին կալանավորելու մասին որոշում էր կայացրել։
Նշենք, որ Գալստյանը ձերբակալվել էր ՀՀ զինված ուժերի կարիքների համար ռազմամթերքի մատակարարման գործընթացում չարաշահումներ և առանձնապես խոշոր չափերով հափշտակություններ կատարելու դեպքերի առթիվ քննվող քրեական գործի շրջանակներում։
